Kúdikti taýda serýendep júrgen áıelderge tıisip, anaıy usynys jasaǵan
Óńirge keletin týrısterdiń záre-qutyn alǵan azǵyndy qoryqshylar kúni-túni izdegenimen, ázirge nátıje bolmapty.
Al manıaktyń qurbanyna aınala jazdaǵan Marııa Sedova men Marına Nahımova Fýrmanov shyńyn baǵyndyrýǵa Reseıden arnaıy kelgen. Kim asar shatqalynda jetken boıda qyzdar naǵyz shytyrman oqıǵaǵa tap bolady.
"Marııaǵa júgirip kelip "pyshaq tyǵyp alamyn" dedi. Tipti "atyp tastaımyn" dep ses kórsetti", - deıdi Marına Nahımova.
Olardyń aıtýynsha, beıtanys jigit áýeli áńgimege tartyp, qyzdardyń jalǵyz júrgenine kóz jetkizgen soń, oǵash qylyq tanyta bastaǵan. Marııa men Marınanyń izinen qalmaı, qýalap, pyshaqpen qorqytypty. Abyroı bolǵanda, jolda basqa týrıster kezigip, álgi azǵyn qarasyn batyrady.
Budan bólek, kúdikti sol kúni taýda serýendep júrgen taǵy eki áıelge tıisip, anaıy usynys jasaǵan kórinedi.
"Ol adamdy sýretten kórdik. Aryqtaý kelgen. Basynda qalpaǵy bar. Saqal-murtty eken. Sol sýret arqyly izdep jatyrmyz", - deıdi qoryqshylardyń biri.
Ile Alataýy memlekettik ulttyq saıabaǵynyń Medeý fılıaly dırektorynyń orynbasary Serikjan Suranshın týrısterdi qoryqpaı demalýǵa shaqyryp, azǵynnyń mindetti túrde tabylatynyna senim bildirdi.
Al qazir ormandy qoryqshylar, taý etegin polıııa jiti baqylaýǵa aldy.
"Adyrna" ulttyq portaly