Prezıdent Abaı óleńderin oqý estafetasyn bilim jáne ǵylym, mádenıet jáne sport mınıstrlerine, ánshi Dımash Qudaıbergenge joldady
Memleket basshysy Qasym-Jomart Toqaev 9 jastaǵy mektep oqýshysy Láılim-Shyraqtan óleń oqý estafetasyn qabyldady. Bul týraly prezıdenttiń baspasóz hatshysy Berik Ýálı facebook-tegi paraqshasynda habarlady.
Láılim-Shyraq qazaqtyń uly aqyny Abaı óleńderinen úzindi oqyp, bul estafetany jalǵastyrýdy prezıdent Qasym-Jomart Toqaevqa joldaǵan eken.
"Memleket basshysy Láılim-Shyraqtyń bul usynysyn zor qýanyshpen qabyldap, kemeńger aqynnyń jastardy bilim men ǵylymǵa shaqyratyn, maqsatyńa jetý jolynda qajet asyl qasıetterdi atap kórsetken "Ǵylym tappaı maqtanba" atty óleńinen úzindi oqyp, jaýap berdi", - dep jazdy Berik Ýálı.
Onyń aıtýynsha, Toqaev Abaı óleńderin oqý estafetasyn odan ári bilim jáne ǵylym mınıstri Ashat Aımaǵambetovke, mádenıet jáne sport mınıstri Aqtoty Raıymqulovaǵa jáne búkil álemdi moıyndatqan talantty ánshi Dımash Qudaıbergenge joldady.
