Aqmola oblysynyń ákimi Marat Ahmetjanov Bulandy aýdanynyń Jýravlevka jáne Kapıtonovka aýyldarynda bolyp, sý tasqynynan zardap shekken turǵyndarmen kezdesti, dep habarlaıdy «Adyrna» ulttyq portaly.
Ákimdiktiń baspasóz qyzmetiniń málimetinshe, 11 sáýirde Boqsyq ózeniniń tasýy saldarynan eldi mekenderdi sý basqan. Evakýaııalyq pýnktterge 400-ge jýyq adam jetkizildi, turǵyndardyń bir bóligi týystarynda ornalasty. Úı janýarlary qaýipsiz jerge shyǵaryldy.
Búgindi tanda eldi mekenderdegi jaǵdaı turaqty.
Turǵyndar úılerine oraldy. Jergilikti atqarýshy organdar qajetti kómekti anyqtaý jáne zalaldy esepteý maqsatynda turǵyndarǵa habarlasýda. Aýyldarǵa gýmanıtarlyq kómek - azyq-túlik jáne tósek-oryn jabdyqtary jetkizildi.
Jýravlevka aýyldyq okrýginiń ákimi Tatıana Gılgerbergtiń aıtýynsha, ákimdik ár turǵynǵa aldyn ala habarlaǵan. Ergin qar sýy aýylǵa 10 mınýtta jetken.
«Barlyq sharalar qoldanylýda. Jergilikti deńgeıde tótenshe jaǵdaı jarııalandy. Aýdan ákimine tehnıkalyq tekserý júrgizýdi tapsyrdym, Tótenshe jaǵdaı saldaryn joıý jónindegi komıssııa quryldy. Komıssııa aýyldarǵa baryp, sol jerde jedel jumys isteýi kerek. Barlyǵyna kómek kórsetilip, shyǵyn óteledi. Sizderge túsinistik pen shydamdylyq kórsetkenderińiz úshin alǵys aıtamyn», - dedi turǵyndarmen kezdesýinde Aqmola oblysynyń ákimi Marat Ahmetjanov.
