Soltüstık Qazaqstan oblysynyŋ äkımı halyqqa ündeu jasady, dep habarlaidy "Adyrna" tılşısı Stan.kz-ke sıltep.
Ǧauez Nūrmūhambettıŋ aituynşa aimaqtaǧy ahual älı de kürdelı.
“Öŋırde su tasqyny jaǧdaiy kürdelı. Oblys ortalyǧyna ülken su kele jatyr. Bırınşı kezekte erıgen sudy eldımekenderge jetkızbei būruǧa tyrysyp jatyr. Qazır Esıl özenımen ülken su kele jatyr.Sergeev su qoimasynda tolyp ketudıŋ absoliut rekordy – 4 metr 25 santimetr tırkelgenı anyqtaldy.
"Ülken su Esıl özenı boiyndaǧy eldımekenderge qauıp töndıredı. Şamamen bır-ekı künnen keiın su oblys ortalyǧyna jetedı. Pribrejnoe jäne Teplichnoe auyldaryn, Zarechnyi kentın su basu qaupı tönıp tūr. Petropavlǧa qarai ülken su aǧyny kele jatyr. Taǧy da qaitalap aitamyn, ülken! Premer-ministrdıŋ bırınşı orynbasary Roman Vasilevich Skliardyŋ tapsyrmasy boiynşa üilerı su basu aimaǧynda ornalasqan Zarechnyi kentınıŋ tūrǧyndaryn evakuasiialap jatyrmyz. Tūrǧyndardan tüsınıstıkpen qaraudy jäne su tasqyny kezeŋındegı talaptarǧa bei-jai bolmaudy sūraimyn", – dedı äkım.Odan bölek oblys äkımı qiyndyqta kömek qolyn sozǧandarǧa alǧys aitty.
"Biylǧy su tasqyny bärımız üşın ülken synaq bolyp otyr. Bırlıktıŋ arqasynda bız barlyq qiyndyqty jeŋemız. Qazır ülken sumen küreske üş myŋnan astam adam jūmyldyryldy. Olar – merdıger ūiymdar, qūrylys kompaniialary, käsıpkerler, memlekettık qyzmetkerler, qūtqaruşylar, kommunaldyq qyzmetter, poliseiler, erıktıler jäne bızdıŋ qala men audandardyŋ qarapaiym tūrǧyndary. Kömekke basqa aimaqtardan qūtqaru qyzmetterı, ūlttyq ūlan men qorǧanys ministrlıgınıŋ qyzmetkerlerı keldı. Men osy qiyn kezeŋdegı kömegı üşın barlyǧyna rizamyn. Adami tūrǧyda alǧys aitamyn. Alda ülken synaq kütıp tūr. Eŋ bastysy – sabyrly bolu jäne bır-bırımızge kömektesu. Su tasqyny auqymyn elemeuge bolmaidy. Jaqyndaryŋyzdy oilaŋyz. Eger sızdıŋ üiıŋız nemese saiajaiyŋyz su basu aimaǧynda bolsa, qauıpsız jerge köşıŋız. Adam ömırınen qymbat eşteŋe joq. Saq bolyŋyz. Bız bärımız jaqsydan ümıttımız, bıraq eŋ naşar jaǧdaiǧa daiyn bolu kerekpız. Tūrǧyndarymyzdyŋ qauıpsızdıgın qamtamasyz etu jäne su tasqynynyŋ saldaryn barynşa azaitu üşın bar küşımızdı salamyz. Barlyǧymyzǧa şydam pen sättılık tıleimız", – dedı Ǧauez Nūrmūhambet.
Ūqsas jaŋalyqtar
