Aqtóbe oblysyna sapary barysynda premer-mınıstr, Sý tasqynyna qarsy is-sharalardy úılestirý jáne sý tasqynynyń zardaptaryn joıý jónindegi respýblıkalyq shtabtyń jetekshisi Oljas Bektenov erigen sý saldarynan qıraǵan bógetti kórip qaıtty. Bógettiń sýreti premer-mınıstrdiń resmı saıtynda jarııalanǵan, - dep habarlaıdy "Adyrna" ulttyq portaly.
Oljas Bektenov kólemi 15,8 mıllıon m3 bolatyn Maǵadjan bógetin aralap kórdi, onda qarǵyn sý aǵyny saldarynan Maǵadjan sý qoımasynyń bógeti buzylǵan. Ol 1985 jyly paıdalanýǵa berilgen. Gıdrotehnıkalyq qurylys jekemenshik "Tulpar" JShS kompanııasynyń ıeliginde. Qyzyltý aýylynan 25 adam, Tabantal qystaǵynan 11 adam evakýaııalandy.
"Jalpy oblysta tasqyn qaýpi áli seıilmegen. Qazir ózenderdiń kópshiliginde sý arnasynan asyp ketkeli tur. Óńirde 792 úı sý astynda qaldy. Oblystyń 5 aýdanynda (Qobda, Muǵaljar, Temir, Áıteke bı, Oıyl) jáne Aqtóbe qalasynda jergilikti aýqymdaǵy tabıǵı sıpattaǵy tótenshe jaǵdaı jarııalandy. Sý tasqynyna qarsy is-sharalarǵa jeke quramnan 3140 adam, 664 tehnıka jumyldyryldy. Barlyǵy 8 978 adam qaýipsiz jerge kóshirildi", - delingen habarlamada.
