Qazaqstan men Ózbekstan temirjol salasynda birlesken kásiporyn qurmaq. Bul týraly búgin, 5 sáýirde Hıýa qalasynda ótken Qasym-Jomart Toqaev pen Ózbekstan prezıdenti Shavkat Mırzııoevtiń beıresmı kezdesýi kezinde aıtyldy, dep habarlaıdy «Adyrna» tilshisi.
«Eki el basshylary óńirdegi ózara yntymaqtastyqty nyǵaıtý úshin Qazaqstan men Ózbekstannyń temirjol ákimshilikteri arasynda birlesken kásiporyn qurý týraly bastamaǵa qoldaý bildirdi. Bul birlesken kásiporyndy qurýdaǵy maqsat: Qytaı – Qazaqstan – Ózbekstan baǵytyndaǵy júk tasymalyn uıymdastyrý úshin qazaq-qytaı shekarasyndaǵy jáne Ózbekstandaǵy júk termınaldaryn ózara tıimdi negizde paıdalaný»,—delingen habarlamada.
Atalǵan joba ekijaqty saýdany jandandyryp, taýar tasymalynyń kólemin arttyrýǵa yqpal etedi, sondaı-aq ońtústik baǵyttaǵy júk tasymalyn ulǵaıtýǵa qolaıly jaǵdaı týǵyzady.
Birlesken kásiporyn Transaýǵan baǵytyn damytýǵa jumyldyrylady.
