Sanaly ǵumyryn teatr ónerine arnaǵan qazaqtan shyqqan tuńǵysh rejısser qyz Ǵaını Haırollaqyzynyń týǵanyna - 110 jyl toldy, dep habarlaıdy "Adyrna" uttyq portaly.
Ǵaını Haırollaqyzynyń esimi keıbir derekterde «Ǵaınıjamal» dep te atalady. 1914 jyly Atyraý oblysy, Qurmanǵazy aýdanynda (burynǵy Teńiz aýdany – avt.) dúnıege kelgen. Ǵaınıjamaldyń óner álemine qadam basýyna túrtki bolǵany ákesi Haırollanyń ulttyq aspabymyz – dombyranyń qulaǵynda oınaýy edi. Ákesiniń qanymen daryǵan qasıet qarshadaı qazaq qyzynyń Reseıdegi joǵary oqý oryndarynda bilim alýyna jol ashty.
Alǵashqy baspaldaǵy Lenıngrad óner tehnıkýmyndaǵy qazaq stýdııasynan bastalady. Qazaq stýdııasynda qyzmet etetin «Shyǵys úıi» atty uıymynda Orta Azııadan kelgen jastar óner kórsetip, sonyń ishinde Ǵaınıjamaldyń ulttyq aspabymyz – dombyranyń qulaǵynda oınap, halyq kúılerinen tartý jasaýy, sol bir mezette kýá bolǵan jastardy eleń etkizedi.
1938 jyly dıplomdyq jumysyn qorǵap, arman saparyna attanady.1947 – 1949 jyldary Jambyl oblystyq qazaq drama teatrynyń rejısseri qyzmetin atqarady. Rejısserlik bilimin shyńdaý maqsatynda 1956 jyly Máskeý qalasyndaǵy óner ınstıtýtyna oqýǵa túsedi.
Qazaqstannyń Halyq ártisi Aısha Abdýllına (1916 – 2019) 2017 jyly 8 naýryzda, «Egemen Qazaqstan» gazetinde jaryq kórgen «Meniń baǵymdy ashqan – Kúlásh Baıseıitova» atty suhbatynda: «Halyq ártisi ataǵyn alýyma qazaqtan shyqqan alǵashqy áıel-rejısserlerdiń biri Ǵaınıjamal Haırýllına qomaqty úles qosty. Ǵaınıjamaldyń 1958 jyly ázirlegen tórt qoıylymy úzdik shyǵyp, Máskeýdegi sahna maıtalmandary moıyndady», dep óz esteligin aıtady. Óner zertteýshisi Borıs Erzakovıchtiń «Qazaq halqynyń ǵashyqtyq ánderi» atty antologııasynda (qurastyrǵan ónertaný ǵylymynyń kandıdaty Q.Júzbasov) Ǵaınıjamalmen júzdesken sátterinen epızodtar usynady.
Ǵaınıjamal Haırollaqyzynyń shyǵarmashylyǵyna aýqymdy taldaý teatrtanýshy, ónertaný ǵylymdarynyń kandıdaty Baqyt Kákıqyzy Nurpeıistiń «Qazaq teatr rejıssýrasynyń qalyptasýy men damý kezeńi (1915-2005 jj.)» atty 520-betten turatyn monografııada jasalǵan.
Ǵaınıjamal Haırollaqyzynyń shyǵarmashylyǵynyń 1-kezeńi: 1938-1961 jyldardy, 2-kezeńi: 1961 jyldan ómiriniń sońyna deıingi ýaqytty qamtıdy. Balalar men jasóspirimder teatrynda, keıin Almaty memlekettik óner ınstıtýtynda (qazirgi Qurmanǵazy atyndaǵy ulttyq konservatorııada) ustazdyq qyzmet atqarady. 1967 jyly 53 jasynda kenetten dúnıeden ozdy.
