Memleket basshysy Qasym-Jomart Toqaevtyń atyna Naýryz meıramyna oraı quttyqtaý jedelhattary kelip túsip jatyr, dep habarlaıdy «Adyrna» tilshisi Aqordaǵa silteme jasap.
Qytaı Halyq Respýblıkasynyń Tóraǵasy Sı zınpın Qasym-Jomart Toqaev pen qazaqstandyqtardy Naýryz meıramymen quttyqtady.
– Men qazaq-qytaı baılanystaryn damytýǵa basa mán beremin. Eki el arasyndaǵy dástúrli dostyqty nyǵaıtýǵa negizdelgen ózara tıimdi jáne jan-jaqty yntymaqtastyqty keńeıtý úshin Sizben kúsh-jiger biriktirýge daıynmyn, – dep jazylǵan jedelhatta.
Al AQSh prezıdenti Djozef Baıden óz quttyqtaýynda elderimizdiń klımattyq daǵdarys, energetıkalyq qaýipsizdik jáne ekologııa máselelerin sheshý isindegi sońǵy jyldary qol jetkizgen tabystaryn maqtan tutatynyn atap ótken.
– Bul yntymaqtastyq urpaq bolashaǵyn jarqyn etýge septigin tıgizedi. Úmit pen jańarýdyń nyshany bolyp sanalatyn Naýryzda elderimizdiń arasyndaǵy seriktestik pen halyqtarymyzdyń dostyǵy odan ári nyǵaıa beretinine senimdimin, – delingen jedelhatta.
Túrkııa prezıdenti Rejep Taııp Erdoǵan óz quttyqtaýynda Naýryzdyń jaqsylyq pen molshylyqtyń meıramy ekenine nazar aýdarǵan.
– Ortaq mádenıetimizdiń mańyzdy bóligi sanalatyn osy aıtýly kúnde dostyq pen baýyrlastyq baılanystarymyz odan ári nyǵaıa túserine senim bildiremin, – dep jazylǵan jedelhatta.
Ózbekstan prezıdenti Shavkat Mırzıëev óz quttyqtaýynda baýyrlas halyqtar bul meıramdy myńdaǵan jyldan beri saltanatty túrde ári keń kólemde toılap kele jatqanyn aıtty.
– Ózara senimge, qurmet pen ortaq múddege negizdelgen baýyrlas jáne kórshiles eki el arasyndaǵy yntymaqtastyq odan ári nyǵaıyp, qarqyndy túrde damı beretinine senimdimin, – dep jazylǵan jedelhatta.
Qyrǵyzstan prezıdenti Sadyr Japarov óziniń quttyqtaý jedelhatynda kóneden kele jatqan Naýryz meıramy qyrǵyz ben qazaq halyqtarynyń tarıhy men qundylyqtarynyń ortaq ekenin bildiretinin atap ótken.
– Aldaǵy ýaqytta júzege asyrylatyn ekijaqty is-sharalardyń nátıjeleri elderimiz arasyndaǵy saıası dıalogtyń joǵary deńgeıde ekenin naqtylap, qyrǵyz-qazaq yntymaqtastyǵyn odan ári nyǵaıtýǵa yqpal etetinine senim bildiremin, – dep jazylǵan jedelhatta.
