Reseı prezıdenti saılaýynda Vladımır Pýtın 87,3%-dan astam daýys jınap, jeńiske jetti. Pýtındi Ortalyq Azııa basshylary quttyqtaýǵa asyǵýda, dep habarlaıdy “Adyrna” ulttyq portaly.
Alǵashqylardyń biri bolyp Ózbekstan prezıdenti Shavkat Mırzıeev saılaý naýqany sátti ótýimen quttyqtady. Quttyqtaýdy Ózbekstan prezıdentiniń baspasóz hatshysy Sherzod Asadov jarııalady.
Mırzıeev joldaýynda Pýtınniń senimdi jeńiske jetkenin basa aıtty.
Ózbekstan prezıdenti saılaýshylardyń joǵary belsendiligi men daýystardyń joǵary paıyzy reseılikterdiń basym bóliginiń senimin jáne Vladımır Pýtınniń saıası baǵyty men áleýmettik-ekonomıkalyq reformalaryn qoldaıtynyn rastaıdy dep sanaıdy.
Mırzıeev joldaýyn Pýtınge densaýlyq pen baq-bereke, al Reseı azamattaryna beıbitshilik pen gúldený tileýmen aıaqtady.
Tájikstan prezıdenti Emomalı Rahmon da reseılik áriptesine jedelhat joldap, jeńisimen quttyqtady. Joldaý mátini Tájikstan basshysynyń saıtynda jarııalanǵan.
«Sizdi Prezıdenttik saılaýdaǵy senimdi jeńisińizben shyn júrekten quttyqtaımyn. Sońǵy daýys berýdiń nátıjeleri Sizdiń joǵary saıası bedelińizdiń jáne eldiń turaqty áleýmettik-ekonomıkalyq damýyn qamtamasyz etý jáne onyń halyqaralyq ustanymdaryn nyǵaıtý jónindegi memlekettik baǵytyńyzdy reseılik qoǵam tarapynan keń qoldaýdyń taǵy bir aıqyn dáleli», - delingen habarlamada.
Tájikstan prezıdenti Máskeýmen strategııalyq seriktestikti nyǵaıtý Dýshanbe úshin mańyzdy ekenin atap ótti. Rahmon ekijaqty qarym-qatynastyń qarqyndy damýyna Vladımır Pýtınniń jeke úlesi yqpal etip otyrǵanyn atap ótti.
Tájikstan Prezıdenti memleketaralyq qarym-qatynastardy jańa deńgeıge kóterý úshin reseılik áriptesimen odan ári belsendi jumys isteýge beıildi ekenin qosty.
Qyrǵyz Respýblıkasynyń Prezıdenti Sadyr Japarov ta Vladımır Pýtınmen telefon arqyly sóılesip, quttyqtady.
Sadyr Japarov Vladımır Pýtındi prezıdenttik saılaýdaǵy senimdi jeńisimen quttyqtap, bul Reseı memleketiniń memlekettik táýelsizdikti nyǵaıtýdaǵy, halyqtyń ál-aýqatyn arttyrýdaǵy dana saıasaty men janqııarlyq eńbegin orys halqynyń joǵary baǵalap, qoldaýynyń aıqyn dáleli ekenin aıtty.
Sondaı-aq, ol Qyrǵyzstan men Reseı arasyndaǵy odaqtastyq jáne strategııalyq seriktestik qatynastaryn odan ári nyǵaıtý boıynsha birlesken kúsh-jiger basym salalardaǵy memleketaralyq ózara is-qımyldyń búkil keshenin damytýǵa yqpal etedi dep sanaıdy.
Eki el basshylary qyrǵyz-reseı ekijaqty jáne kópjaqty yntymaqtastyǵynyń ózekti máselelerin, ıntegraııalyq odaqtar aıasyndaǵy elderdiń ózara is-qımylyn, sondaı-aq Máskeýde ótetin Joǵary Eýrazııalyq ekonomıkalyq keńestiń mereıtoılyq otyrysyn talqylady. Aǵymdaǵy jyldyń mamyrynda atalǵan mereıtoıǵa Sadyr Japarov qatyspaq.
Aıta keteıik, buǵan deıin Qazaqstan Prezıdenti Qasym-Jomart Toqaevtyń Vladımır Pýtındi quttyqtaý jedelhatyn jarııalaǵan edik.
Pýtındi quttyqtaǵandar arasynda Qazaqstan, Tájikstan, Ózbekstan prezıdentterinen bólek, Bolıvııa Lýıs Arse, Nıkaragýa Danıel Ortega, Gondýras Sıomara Kastro jáne Kýba Mıgel Dıas-Kanel bar. Sonymen qatar Moldova Gagaýz avtonomııalyq respýblıkasynyń basshysy Evgenııa Gýýl men Mıanma premer-mınıstri Mın Aýn Hlaıng quttyqtaý joldady.
Eldegi zańdar men Konstıtýııany óz bilgeninshe ózgertip kele jatqan Pýtın 2000 jyldan beri bıyl besinshi ret saılaýǵa túsken.
