Soltústik Qazaqstan oblysynyń «Aıyrtaý aýdandyq aýrýhanasy» 62 883 500 teńgege kómir satyp almaq, – dep habarlaıdy Adyrna ulttyq portalynyń tilshisi satypalu.gov.kz/ saıtyna silteme jasap.
Qylyshyn súıretken qys bitip, kúlimdep kóktem kelip jatqan shaqta aýdandyq aýrýhana 15 500 tonna kómirdi ne istemek? Bıýdjettiń 62 883 500 teńgesiniń suraýy joq pa? Bul suraqtarǵa jaýap tabý úshin tender habarlamasyn zerttep kórdik.
"Soltústik Qazaqstan oblysy ákimdiginiń densaýlyq saqtaý basqarmasy" kommýnaldyq memlekettik mekemesiniń "Aıyrtaý aýdandyq aýrýhanasy" sharýashylyq júrgizý quqyǵyndaǵy kommýnaldyq memlekettik kásiporny jarııalaǵan memlekettik satyp alýǵa ótinim berý 19-naýryz kúni bastalyp, jeńimpaz 4-sáýir kúni anyqtalady eken. Aýdandyq aýrýhana «qystyń qamyn jazda oılap», jaz emes, tipti kóktemde oılap, kelesi qysqa daıyndyqty bastap ketipti.
Memlekettik satyp alýdyń jeńimpazy 15 500 tonna kómirdi Aıyrtaý aýdanyna qarasty aýyldardyń emhanalaryna shilde, tamyz, qyrkúıek aılary ishinde jetkizip berýi kerek eken.
Árıne, qysy qytymyr soltústiktiń sýyǵyna kúmán keltire almaımyz! Biraq, birinshiden shildede satyp alǵan kómir qazan aıyna deıin úgilip, ýatylyp ketpeı me? Tehnıkalyq sıpattamada kórsetilgen kómirdiń D sorty (uzyn tas) ylǵaldylyǵyn kúz kelgenshe aırylyp qalmaı ma?
Ekinshiden, soltústiktegi aýdandyq aýrýhana kelesi qysqa daıyndyqty ne sebepti erte bastap otyr? Aýdandyq aýrýhana tenderdi asyqpaı jaz aıaqtalǵan soń jarııalap, kómir kúzdiń alǵashqy aılarynda satyp alýǵa bolmas pa edi?
Bul suraqtardy tıisti mekemege joldadyq. Ol jaqtan jetken jaýapqa da minber berýge daıynbyz!
Qanat Birlikuly
Adyrna.kz
