Áleýmettiń áleýetin arttyrýdy dittegen QR Prezıdenti Qasym-Jomart Toqaev taǵy bir tyń bastama usyndy. Bul az qamtylǵan jáne kópbalaly otbasylardaǵy balalarǵa arnalǵan bilim granttarynyń sanyn kóbeıtý jáne mamandyqtary boıynsha stýdentterge arnalǵan stıpendııalardy ulǵaıtý. Halyqtyń turmys deńgeıin kóterý maqsatynda týyndaǵan bul tapsyrma aıasynda JOO-da 5 myń grant bólinedi.
Buǵan qosa, bıylǵy 1 qyrkúıekten bastap mamandyqtary boıynsha bilim alǵan stýdentterdiń shákirtaqysy 30 paıyzy kóteriledi. Áleýmettik bastama munymen shektelmeıdi. Memleket basshysy az qamtylǵan otbasylardan shyqqan balalarǵa áleýmettik qoldaý sharalaryn júıeli túrde júrgizbek. Atap aıtqanda, osyndaı sanatqa jatatyn otbasylardyń balalaryna tegin ystyq taǵamdar berý men tasymaldaýdy uıymdastyrý, mektepke qajetti zattarmen qamtamasyz etemiz dep ýáde berdi.
Aıta keterligi, Memleket basshysy saýda-sattyq soǵystary men sankııaǵa qatysty Qazaqstan aldynda turǵan kúrdeli máselelerge qaramastan, halyqty áleýmettik qoldaý sharalaryn qolǵa alý jalǵasatynyn atady. «Igilik barshaǵa» degen ustanymdy berik ustanǵan Qasym-Jomart Kemelulynyń bul ıgi qadamy stýdenterdiń sapaly bilim alýyna, eldiń erteńine senimmen qaraýyna septigin tıgizbek. Esterińizge sala keteıik, Qazaqstanda táýelsizdik jyldarynda 2,8 mıllıon joǵary bilimdi maman daıarlanǵan. Salystyrmaly túrde qarasaq, 1991 jyly joǵary bilimi bar adamdardyń sany 42 myń bolsa, 2018 jyly bul kórsetkish 151 myń adamǵa jetken.
"Adyrna" ulttyq portaly
