«AMANAT» partııasy «Qaryzsyz qoǵam» jobasynyń aralyq qorytyndysyn shyǵardy. Bıyl qańtar-aqpan aılarynda el aýmaǵyndaǵy 15 myń otandasymyz qarjylyq saýatyn arttyryp, oqytý kýrsynan ótti.
«Qaryzsyz qoǵam» jobasyna qatysqan 100-den astam áıel búgin Alǵys aıtý kúni jáne aldaǵy 8 naýryz merekesi qarsańynda Astanada arnaıy bas qosyp, qaryzdan qutylýdyń, otbasy tabysyn arttyrýdyń tájirıbesimen bólisti.
Májilis Spıkeri, «AMANAT» Tóraǵasy Erlan Qoshanov Prezıdent el azamattarynyń shamadan tys nesıe alýy máselesine birneshe ret nazar aýdarǵanyn atap ótti. Memleket basshysynyń tapsyrmasy boıynsha qıyn jaǵdaıǵa tap bolǵan otbasylardyń nesıesi keshirilip, jeke tulǵalardyń bankrottyǵy týraly zań qabyldandy, halyqtyń nesıege táýeldiligin tómendetý boıynsha jańa zańnamalyq túzetýler ázirlenýde. Biraq tájirıbe kórsetkendeı, bul kúrdeli áleýmettik máseleni sheshý úshin qoǵamda jańa «qarjylyq mádenıet» qalyptastyrý qajet.
«Ózderińiz biletindeı, partııa «Qaryzsyz qoǵam» jobasyn júzege asyrý jóninde tyń bastama kóterdi. Prezıdent Qasym-Jomart Toqaev ony qoldap, onyń aýqymyn jalpyhalyqtyq deńgeıge shyǵarýdy tapsyrdy. Bul jumysqa Úkimet pen Ulttyq bank qosyldy. «Qaryzsyz qoǵam» jobasy qaryzǵa belsheden batyp, úmitin úzgenderge naqty qoldaý kórsetedi. Joba qolda bar qarajatqa ómir súrýge, qajetsiz nesıeden bas tartýǵa úıretedi. Barlyq aımaqtaǵy azamattar bul jobaǵa qoldaý bildirip, ony jalǵastyrýdy surap otyr», – dedi ol.
2024 jyly elimizdiń barlyq óńirinde 200 myń adam qarajatqa jaýapkershilikpen qarap, tabysty arttyrýdyń ádis-tásilin úırenedi. Buǵan qosa, mektep, kolledj jáne joǵary oqý ornyna arnalǵan oqý quraldary ázirlenedi. Bul qadam 100 myńǵa jýyq stýdent pen 450 myń joǵary synyp oqýshylarynyń saýatyn arttyrýǵa múmkindik beredi. Osylaısha, joba aıasynda 750 myń adam qamtylady.
«AMANAT» partııasy «Qaryzsyz qoǵam» jobasyn únemi jetildirip keledi. Jobaǵa qatysýshylardyń 75%-y – áıelder. Onyń jartysynan kóbisi – kópbalaly analar. Partııa olarǵa jaǵdaıdy jaqsartýdyń jańa quralyn usyndy. Atap aıtqanda, oqýdan ótken áıelder jeke kásibin bastaý úshin qaıtarymdy grant pen lızıngke qural-jabdyq satyp ala alady. Bastama aıasynda jyl sońyna deıin 3500 áıeldi qamtý josparlanýda.
«Bul rette, biz búgingi kezdesýge qatysyp otyrǵan kásipker áıelderdiń tájirıbesine súıengimiz keledi. Sizderdiń mindetterińiz – joba tálimgerlerimen birlesip, áıelderdi oqytý jáne olardy turaqty tabys tabatyn deńgeıge jetkizý. Olar ózderińizge qarap boı túzeıdi. Sizder úlgi bolýlaryńyz kerek. Bul – «Qaryzsyz qoǵam» jobasyn júzege asyrýdyń jańa kezeńi», – dedi Erlan Qoshanov.
Budan soń, «Qaryzsyz qoǵam» jobasyna qatysýshylar sóz aldy. Máselen, Túrkistan oblysynan kelgen tórt balanyń anasy Aınur Esenova alǵashynda «Qaryzsyz qoǵam» jobasyna senimsizdikpen qaraǵanyn moıyndady. Alaıda, oqytý kýrsy aıaqtalǵannan keıin, ol otbasylyq bıýdjetti durys basqarýdy úırenip qana qoımaı, tabysty arttyrýdyń jolyn tapty.
«Aýyldastarymnan sút jınap, odan kurt-maı jasap satamyn. Qazir úı turǵyzyp jatyrmyz. Qurylys jumysy áli aıaqtalǵan joq. Esesine, jańa tereze men batareıa alýǵa qajet qarajat taptym. Sonymen qatar, «Aýyl amanaty» jobasy aıasynda jeńildikpen 4,2 mln teńge nesıe alyp, oǵan 8 bas mal satyp aldym. Aı saıyn 250 myń teńge kóleminde turaqty tabys taýyp otyrmyn», – dedi ol.
Al Mańǵystaý oblysynyń qatysýshysy Asyltas Qýatbaeva jobaǵa qatysqanǵa deıin jalaqysynyń jartysyn qaryz qaıtarýǵa jumsap keldi. Jubaıy jumysynan aıyrylǵan soń, kópbalaly otbasynyń qarjylyq jaǵdaıy nasharlap ketti.
«Qaryzsyz qoǵam» jobasynyń sarapshylary ótinim resimdeýge kómektesip, sol arqyly memleketten óz isimizdi bastaýǵa múmkindik bergen grant aldyq. Nátıjesinde, qus etinen shujyq ónimderin óndiretin kásiporyn ashtyq. Qazir kásibimizdi ary qaraı damytyp jatyrmyz. Otbasylyq tabysymyz 650 myń teńgeden asyp, qaryzymyzdyń kóp bóliginen qutyldyq», – dedi ol.
Aıta keteıik, bıyl jobany júzege asyrýǵa 9 kommerııalyq bank pen 11 memlekettik organ qatysýda. Jobaǵa qatysýǵa nıet bildirýshilerge yńǵaıly bolý úshin qogamfin.kz. onlaın-platformasy ázirlendi. Saıt arqyly oqytý kýrsyna jazylyp, paıdaly materıaldar men beıne sabaqtardy júktep alýǵa bolady.
Is-shara barysynda Premer-Mınıstrdiń orynbasary – Ulttyq ekonomıka mınıstri Nurlan Baıbazarov, Halyk bank-tyń basqarma Tóraǵasy Úmit Shaıahmetova, «Qaryzsyz qoǵam» jobasynyń jetekshisi Aqmaral Bekmurzaeva jáne óńirlerden kelgen joba túlekteri sóz sóıledi.
Foto Álı Ǵalym
