Qazaqstanǧa tanymal sport jurnalisı Nesıp Jünısbai Facebook paraqşasynda Gennadii Golovkinnnıŋ Ūlttyq Olimpiadalyq komitettıŋ basşysy retınde taǧaiyndauǧa qarsy ekenın bıldırdı, dep habarlaidy «Adyrna» ūlttyq portalynyŋ tılşısı.
Jurnalistıŋ aituynşa, komitet basşysyna laiyqty odan da basqa köptegen sportşylar bar. Bıraq eşqandai sailau nätijelerınsız boksşy Gennadii Golokindı komitet töraǧasy etıp taǧaiyndau dūrys emes. «Qazaq sport tarihynda nebır myqty sportşylar boldy. Qajymūqan atamyzdan bastap, keiıngı Käken Ahmetov, Serık Qonaqbaev, Däulet Tūrlyhanov bar, Serık Säpiev, İslam Bairamukov siiaqty sport maitalmandaryn aita alamyz. Osy aty atalǧandardyŋ ärbırı elımızde, ärtürlı salada eŋbek etıp jür. Sonda bız osy adamdardy aşyq sailauǧa şaqyrmai, «Gennadii Golokin Ūlttyq Olimpiadalyq komitettıŋ basşysy bola salsyn» degen bır adamnyŋ sözımen «Jaŋa Qazaqtan – Ädılettı Qazaqstan» bolamyz degen zaŋymyzdy būzbaimyz ba?! Mūndai maŋyzdy şaruany aldyn ala jariialap, sport ūiymdarynyŋ mamandary men öz kandidaturasyn ūsynatyn jandardy jinap, sailau kezınde eşqandai qysym jasamai, ümıtkerlerdı baqylap, basşy taǧaiyndasaq – bız eş uaqytta ökınbes edık. Olimpiadalyq sport oiyndary – qazaq halqynyŋ bet-beinesı, ūlttyq qūndylyqtarymyzdyŋ bır paraǧy, öitkenı olimpiadalyq oiyndarda bızdıŋ chempiondar tūǧyrda jalauymyzdy jelbıretıp, änūranymyzdy äueletedı. Al komitet töraǧasy osyǧan jauapty tūlǧa. Sondyqtan būl jobany keŋ kölemde, jauapkerşılıkpen talqylaǧan dūrys dep esepteimın. Men Golovkinnıŋ myqtylyǧyna aitar dauym joq. Degenmen onyŋ käsıpqoi sporttaǧy jasaǧan eŋbekterı üşın ol eşqandai talapsyz Ūlttyq olimpiadalyq komitettı basqara alady dep kesıp aituǧa kelmeidı», - dep öz oiyn aşyq aitty Nesıp Jünısbai. Sondai-aq «Däulet Tūrlyhanovtyŋ kandidaturasynyn qoldauyŋyzǧa ne sebep?» degen sūraqqa jurnalist bylai dep jauap berdı: - Däulet Tūrlyhanovtyŋ sporttaǧy jeŋısterı men jetken jetıstıkterı köp. Atap aitsaq, Keŋes odaǧynyŋ 7 dürkın chempiony bolu – bırde-bır paluannyŋ qolynan kelmegen jetıstık. Sondai-aq ol bügıngı taŋdaǧy Älemdık küres önerınıŋ atqaru komitetı qatarynda jürgen jalǧyz qazaq. Odan bölek Aziia küres odaǧynyŋ prezidentı, Qazaqstan küres federasiiasynyŋ prezidentı. Al onyŋ jeke ömırıne men pıkır aita almaimyn, bıraq onyŋ sport salasyna qosqan ülesın aitpasqa bolmaidy. Ūlttyq olimpiadalyq komitet – sportşylardy tärbielep, olardy jattyqtyratyn ūiym emes, ol daiyn sportşylardy älem chempionattaryna bastaityn ūiym. 1994 jyly Aziia oiyndaryna Japoniianyŋ Hirosima qalasyna barǧanymyzda (Osaka äuejaiynda), japon jurnalisterı nelıkten Qazaqstan ūlttyq qūramasyndaǧy sportşylardyŋ 97 paiyzy europalyqtar ekenın sūraǧan. Eger oilanatyn bolsaq, būl sūraqtyŋ astarynda ülken män jatyr», - dep jurnalist oiyn qorytyndylady. Esterıŋızge sala keteiık, 26 aqpanda elımızdıŋ Ūlttyq Olimpiada Komitetınıŋ prezidentı auysady. Aldyn ala boljam boiynşa, komitet töraǧasy retınde Gennadii Golovkin taǧaiyndalady dep aitylǧan bolatyn.«Adyrna» ūlttyq portaly
Ūqsas jaŋalyqtar
