Jetisý oblysynda birqatar aýyl men kósheniń ataýy ózgerdi. Bul týraly oblystyq máslıhat depýtaty Gúlnaz Mustafa aıtty, dep habarlaıdy «Adyrna» tilshisi.
«Penjim endi Pıdjım de, Penjim de, Benjim de emes. Ataýy túsiniksiz aýyl Panfılov aýdanynda ornalasqan. Endi ol Atameken dep atalatyn bolady. Al sol óńirdegi taǵy bir aýyl - Lesnovka eldi mekenine Taldy ataýy qaıtarylady. Alakól aýdanynyń Jylandy aýyldyq okrýgine qarasty Áshim aýylyna da buryńǵy Tóńkeris ataýy qaıtarylady»,—dedi ol.
Aıtýynsha, oblystyq onomastıka komıssııasy aýmaq halqynyń pikirin eskere kele qorytyndy jasaǵan. Budan bólek, depýtat Taldyqorǵan qalasyndaǵy aýdan jáne kóshe ataýlarynyń ózgeretinin habarlady.
«Taldyqorǵan qalasynyń 9-shaǵyn aýdany «Qulager», 10-shaǵyn aýdany – «Ál-Farabı» dep atalady, qaladaǵy Voroshılov pen Nevskıı kósheleri budan bylaı Nurǵısa Tilendıev, Abdulhaq Abdulhalyqovtyń atyn alady. Al «Shaıqorǵan» men «Balaýsa» dep atalatyn quramdas bóligindegi barlyq kóshelerine jańa ataýlar beriledi»,—dep tolyqtyrdy Gúlnaz Mustafa.
