Arystaǵy jarylystan zardap shekken 3 adam aýyr halde aýrýhanada jatyr

2291
Adyrna.kz Telegram

Aýrýhanaǵa on shaqty adam jetkizilgen, olardyń úsheýi aýyr halde jatyr

Shymkenttegi birinshi qalalyq aýrýhanaǵa Arystaǵy jarylystan zardap shekkender jetkizile bastady.

Aýrýhananyń bas dárigeri Abylaı Bonbaı úsh adamnyń qazir aýyr hálde jatqanyn habarlady. Barlyǵy on shaqty adam aýrýhanaǵa túsken, dep habarlaıdy otyrar.kz.

"Zardap shekkender jetkizile bastady, olardy qabyldap, qajetti kómektiń bárin kórsetip jatyrmyz", - dedi Bonbaı.

Aıta ketsek, Arystaǵy tótenshe jaǵdaılarǵa baılanysty Ordabasy aýdanynda dárigerlik shtab qurylǵan. Ony Túrkistan oblysynyń densaýlyq saqtaý basqarmasynyń bastyǵy Muqan Egizbaev basqarady.

Jedel jumystar júrgizilýde. Arysqa 30 jedel járdem jiberildi. Qajet bolǵan jaǵdaıda birneshe aýdannan qosymsha jedel járdem kólikteri daıyndalady, dep habarlady óńirlik saıt.

Arystaǵy jarylys

Dúısenbi Túrkistan oblysy Arys qalasyndaǵy áskerı bólimniń aýmaǵyndaǵy qoımada joıqyn jarylys boldy. Qorǵanys mınıstrligi oqıǵanyń mán-jaıy men sebepteri anyqtalyp jatqanyn habarlady.

Arys turǵyndary shuǵyl túrde Shymkent qalasyna kóshirile bastady. Qalada 43 myńǵa jýyq halyq turady.

Áskerı bólimdegi jarylystan keıin Túrkistan oblysynda tótenshe jaǵdaı jarııalandy. Oqıǵa ornyna oblys ákimi Ómirzaq Shókeev jetti.

Oblys ákimi baspasóz qyzmetiniń habarlaýynsha, qazirgi tańda arnaıy shtab qurylyp, áskerıler men quqyq qorǵaý organdary tótenshe jaǵdaı ornynda jumys istep jatyr.

Oblys ákiminiń tapsyrmasy boıynsha turǵyndar úsh baǵyttaǵy lagerlerge ornalastyrylady:

  • Aqdala burylysy
  • 41 razezd
  • Vodozobor

Osy úsh baǵyt boıynsha áskerı kólikter, kamazdar men arnaıy jasaq jumyldyrylýda. Lager basynda turǵyndardy aýdan ákimderi qarsy alyp jaıǵastyrady.

Áleýmettik nysandardy polıııa qyzmetkerleri kóshirip jatyr.

Ákimdik "Bógen" sý qoımasynan tóngen qaýip týraly aqparattyń jalǵan ekenin habarlady. Sondaı-aq, Otyrar men Ordabasy aýdandarynda 100 oryndyq eki gospıtal ashyldy.

 Sputnik.

Pikirler