Qazaqstanda bir mezette oınatylatyn elektrondyq lotereıa dúńgirshekteriniń jumysy toqtatyldy, dep habarlaıdy "Adyrna" ulttyq portaly týrızm jáne sport mınıstrliginiń baspasóz qyzmetine siltep.
"Azamattar men memlekettik organdardan kelip túsken dabyldarǵa jaýap retinde Qazaqstan Respýblıkasy Týrızm jáne sport mınıstrligi 2023 jyly eki ret – mamyr jáne qarasha aılarynda lotereıa operatory – "Sátti Juldyz" AQ-ǵa lotereıa klýbtary men elektrondyq lezde oınatylatyn lotereıa jumysyn uıymdastyrýdy jetildirý boıynsha usynymdar jiberdi. Mınıstrliktiń 20 qańtardaǵy sońǵy usynystaryna sáıkes 30 qańtardan bastap lotereıa operatory respýblıkanyń barlyq aýmaǵynda lotomatic termınaldary/dúńgirshekteri arqyly elektrondyq lezde oınatylatyn lotereıany taratýdy ýaqytsha toqtatty", - delingen sársenbidegi habarlamada.
Alaıda, mınıstrlik keı jerlerde lotomatic-tiń resmı "sary-kók" termınaldaryna uqsas jalǵan qurylǵylar jumys isteı beretindigin joqqa shyǵarmady.
"Osyǵan baılanysty azamattardan muqııat bolýdy jáne zańsyz lotereıa termınaldarynyń qyzmetterin paıdalanbaýdy, sondaı-aq Mınıstrliktiń "Telegram" chat-botyna habarlaýdy suraımyz (https://t.me/stop_online_casino_bot) jáne "WhatsApp" (+7 707 9071507) Lotomatic dúńgirshekteriniń nemese zańsyz lotereıa termınaldarynyń jumysynyń barlyq faktileri týraly habarlasańyzdar bolady. Árbir ótinish lotereıa operatorymen jáne quqyq qorǵaý organdarymen birlesip muqııat pysyqtalatyn bolady. Quqyq buzýshylar jaýapqa tartylady", - dep tolyqtyrdy vedomstvo.
