Semeıde Alashordashy, stalındik qýǵyn-súrginniń qurbany bolǵan Muhamedhan Seıitqulǵa qatysty qundy qujat tabyldy, dep habarlaıdy "Adyrna" ulttyq portaly 24KZ - ke siltep.
Atalmysh qujatty tapqan Abaı oblystyq memlekettik arhıviniń qyzmetkeri - Laýra Qadyrova. Buǵan deıin ol Shákárim Qudaıberdiulynyń buryn-sońdy eshqaıda jarııalanbaǵan fotosyn tapqan bolatyn. Bul joly maman Abaıtanýshy ǵalym Qaıym Muhamedhanovtyń anasy Maqypjamal Seıitqulovanyń prokýratýraǵa jazǵan hatyn anyqtady.
"Árıne, óziniń jubaıy Muhamedhan Seıitqulovty jazyqsyz 37 jyly NKVD azamattary tutqynǵa alyp ketken eken. Osy jóninde ne úshin ol kisini tutqynǵa aldyńyzdar, ol jazyqsyz adam edi degendeı jańaǵy ótinish hatyn bildirgen eken. Bul hattyń óte qundylyǵy Qaıymdaı uly perzentti dúnıege ákelgen Maqypjamal apamyzdyń jazǵan jalǵyz ǵana haty eken. Mundaı óz qolymen jazǵan hat urpaqtarynyń qolynda joq" dedi Laýra Qadyrova.
Eske sala keteik, buǵan deıin Laýra Qadyrova alash ardaqtysy Álıhan Bókeıhannyń 1919 jyly óz qolymen jazǵan ótinishin jurtshylyqqa jarııalaǵan bolatyn.
