Maıqaıyndaǵy avtobýs qulady dep georadar skanerlegen jerden temir qubyr shyqty. Bul týraly oqıúa bolǵan jerden jýrnalıst Ońǵar Qabden jarııalady, dep habarlaıdy “Adyrna” ulttyq portaly.
Aıta keteıik, «Maıqaıyńaltyn» AQ aýmaǵynda avtobýs oıyqqa qulap ketkenine on toǵyzynshy kún.
«Georadar skanerlegen jerden avtobýs tabylýy kerek edi. Biraq, ol jerden temir qubyr shyqty. Keshe ekinshi ekskavatordy ákep túsirdi. Qazir georadar kórsetti degen úsh jerdi qazyp jatyr”, dep jazdy jýrnalıst.
Georadar magnıtometr men gravımetrdiń jumysyn da qatar atqarady. Ol kez-kelgen temirdi kórsete beredi.
“Shuńqyrdyń mańaıyndaǵy jer jarylyp ketken. Qutqarýshylar belderin arqanmen baılap, bastaryn qaterge tigip jumys isteýde. Jarylǵan jerdi kórip boıyńdy taǵy da opyrylyp kete me degen úreı bıleıdi eken», dep jazdy jýrnalıst.
Sondaı-aq, avtobýstyń shopyry Aıyp Tileýbergenov pen qutqarýshy Aıdos Sháımerdenniń týystary Toqaevqa Úndeý joldap, sheteldik qutqarýshylardy shaqyrýyn ótinýde. Olar eki azamatymyz tiri deıdi.
"Qutqarýshylar jumys istemeı jatqan joq. Istep jatyr. Biraq, tehnıkalarynyń shamasy kelmeı jatyr ǵoı. Men Aıdosty tiri dep esepteımin. Tezirek izdep, taýyp berińizder", deıdi Aıdostyń jubaıy Nursulý Sháımerden.
Qutqarý izdeý jumystaryna 147 qutqarýshy men 45 tehnıka úsh ıt jumyldyrylǵan.
Qyryq bes qutqarýshy shuńqyrdyń túbinde jumys istep jatyr.
