Qazaqstandyq sportshylar Majarstanda ótken halyqaralyq týrnırdi bes altyn, tórt kúmispen aıaqtady, dep habarlaıdy "Adyrna" tilshisi.
Majarstannyń Debreen qalasynda bokstan Ishtvan Bochkaı atyndaǵy halyqaralyq týrnıri óz máresine jetti.
Ulttyq Olımpıada komıtetiniń resmı saıtynda týrnırdiń nátıjesi jarııalandy.
Komıtet aqparatynsha, Qazaqstan ulttyq quramasynyń 9 sportshysy fınalǵa deıin jetken. Bylǵary qolǵap sheberleri bes altyn, tórt kúmiske ıe boldy.
Altyn medal jeńip alǵan Ashat Júsipov, Asyljan Serikbaı, Beıbarys Jeksen, Ertýǵan Zeınýllınov jáne 80 keli salmaqtaǵy Erasyl Jaqpekov. Ashat Júsipov fınalda Ýkraına ókili Andreı Tıshkovepen bokstasyp, qarsylasynan basym tústi. Aqtyq márede baq synap, chempıon atanǵan basqa qazaqstandyq boksshylar Majarstan ókilderimen betpe-bet kelgen. Al Asyljan Serikbaı Roland Vereshti tize búktirse, Beıbarys Jeksen Krýzıto Kovachtan basym tústi.
Boksshy Ertýǵan Zeınýllınov Rıchard Kovachty, Erasyl Jaqpekov Pal Kovachty jeńip, altyn ıegeri atandy.
Al tórt sportshy fınalda qarsylasyna ese jiberip, kúmisti qanaǵat etken. Ekinshi oryn ıelengen qazaqstandyq boksshylar qatarynda Danııal Sábıt, Kenje Muratuly, Sabyrjan Aqqalyqov jáne Temirlan Muqataev bar.
