ShQO Tarbaǵataı aýdanynda "Rýhanı jańǵyrý" baǵdarlamasy aıasynda «Tuǵyry bıik Tarbaǵataı» halyqaralyq sport pen óner festıvali ótti.
Shara barysynda Aqsýat aýylynda «QAZAQ promotions» qazaq boksshylarynyń kásipqoı boksta jetistikke jetýin qoldap júrgen promoýterlik kompanııasynyń uıymdastyrýymen Ýkraına, Belorýssııa, Armenııa men Qazaqstannyń kásipqoı boksshylary aıqyn shaıqasta baqtaryn synap, myqtylary anyqtaldy. – Tarbaǵataı tórinde osyndaı kólemde týrnır ótkizýdegi maqsatymyz – aýyl jastaryna buqaralyq sportty nasıhattaý, salaýatty ómir saltyna jastardy qyzyqtyrý jáne qazaqstandyq boks ónerin damytý. Tanylmaı jatqan talantty jastarǵa múmkindik berýimiz qajet. Jergilikti azamattardyń qoldaýymen ótip jatqan úlken doda – týǵan jerge degen súıispenshilik pen rızashylyqtyń kórinisi dep bilemin. Qazaqstannyń árbir azamaty shamasy kelgenshe týǵan jerin kórkeıtip, damýyna óz septigin, úlesin qosyp jatsa, kóshimiz odan saıyn ilgeri basary anyq. Týǵan jerdiń týyn bıik ustaýymyz kerek,-dedi qazaqstandyq kásipqoı boksshy, uıymdastyrýshylar alqasynyń tóraǵasy Qanat Islam.
Dástúrli túrde ótkiziletin dúbirli doda jastardy rýhtandyryp, jańa chempıondar esimin anyqtaıtyn bolady. Jarystyń halyqaralyq deńgeıge kóterilýiniń ózi jaqsy kórsetkish. Aıta ketsek, boksshylar 60 keliden bastap, 100 kelige deıingi salmaq dárejesi aralyǵynda baqtaryn synady.
"Adyrna" ulttyq portaly
