Kókjıde – elimizdiń batys oblystaryn tolyq qamtamasyz ete alatyn jerasty sý qory. Úkimet qaýlysymen 2008 jyly memlekettik tabıǵı-qoryqtyq qordyń tizimine de engen. Degenmen qazirdiń ózinde tushy sý beldeýiniń mańaıynda 5 munaı kompanııasy jumys isteýde. Ekologııa mınıstrliginiń sózinshe bul 2032 jylǵa deıin jalǵasady.
Aldaǵy 8 jylda tushy sý alabynan ne qalady? Sol munaı kompanııalaryna shekteý qoıýǵa ne kedergi? Kókjıde elimizdiń batys aımaǵyndaǵy aýyz sý máselesin sheshe ala ma? Osy jaıly Parlament májilisiniń depýtaty Asqar Sadyqov «Qazaq úni» podkastynda bergen suhbatynda aıtty.
«Kókjıdedegi sý qory Atyraý, Aqtóbe, Mańǵystaý oblystaryn aldaǵy 50 jyl aýyz sýmen qamtýǵa jetedi. Búginde munaı kompanııalarynyń 800-ge jýyq uńǵymasy burǵylaý jumystaryn júrgizýde. Tek munaı emes, hımııalyq zııandy quramdaǵy munaı qaldyqtary tuy sýdy lastap jatyr»,—dedi ol.
Parlament otyrysynda osy kompanııalarǵa qatysty qandaı naqty sheshimder qabyldanǵany jóninde depýtat Ekologııa mınıstrinen tikeleı suraǵyn qoıǵan bolatyn. Erlan Nysanbaevtyń sózinshe, uńǵymalardy alý sharalary 2024-2032 jyldar aralyǵynda júredi. Al bul ýaqyt arasynda sý alaby ishýge jaramsyz bolyp qalýy ábden múmkin.
Aıta ketetini, Indýstrııa jáne ınfraqurylymdyq damý mınıstrliginiń habarlaýynsha, Mańǵystaý oblysynda aýyz sý máselesi asa ózekti. Aımaqta tuy sý kózderiniń jetispeýshiligine baılanysty halyqqa sý jazda keste boıynsha beriledi.
