Kökjide – elımızdıŋ batys oblystaryn tolyq qamtamasyz ete alatyn jerasty su qory. Ükımet qaulysymen 2008 jyly memlekettık tabiǧi-qoryqtyq qordyŋ tızımıne de engen. Degenmen qazırdıŋ özınde tūşy su beldeuınıŋ maŋaiynda 5 mūnai kompaniiasy jūmys ısteude. Ekologiia ministrlıgınıŋ sözınşe būl 2032 jylǧa deiın jalǧasady.
Aldaǧy 8 jylda tūşy su alabynan ne qalady? Sol mūnai kompaniialaryna şekteu qoiuǧa ne kedergı? Kökjide elımızdıŋ batys aimaǧyndaǧy auyz su mäselesın şeşe ala ma? Osy jaily Parlament mäjılısınıŋ deputaty Asqar Sadyqov «Qazaq ünı» podkastynda bergen sūhbatynda aitty.
«Kökjidedegı su qory Atyrau, Aqtöbe, Maŋǧystau oblystaryn aldaǧy 50 jyl auyz sumen qamtuǧa jetedı. Bügınde mūnai kompaniialarynyŋ 800-ge juyq ūŋǧymasy būrǧylau jūmystaryn jürgızude. Tek mūnai emes, himiialyq ziiandy qūramdaǧy mūnai qaldyqtary tūşy sudy lastap jatyr»,—dedı ol.
Parlament otyrysynda osy kompaniialarǧa qatysty qandai naqty şeşımder qabyldanǧany jönınde deputat Ekologiia ministrınen tıkelei sūraǧyn qoiǧan bolatyn. Erlan Nysanbaevtyŋ sözınşe, ūŋǧymalardy alu şaralary 2024-2032 jyldar aralyǧynda jüredı. Al būl uaqyt arasynda su alaby ışuge jaramsyz bolyp qaluy äbden mümkın.
Aita ketetını, İndustriia jäne infraqūrylymdyq damu ministrlıgınıŋ habarlauynşa, Maŋǧystau oblysynda auyz su mäselesı asa özektı. Aimaqta tūşy su közderınıŋ jetıspeuşılıgıne bailanysty halyqqa su jazda keste boiynşa berıledı.
