Iranda «bala kelin» atanǵan 29 jastaǵy Samıra Sabzıan darǵa asyldy. Ol 10 jyl buryn ólim jazasyna kesilgen. Bul týraly The Times basylymy Iran Human Rights quqyq qorǵaý uıymyna silteme jasap jarııalady, dep habarlaıdy “Adyrna” ulttyq portaly.
2009 jyly 15 jasar Samıra jasy úlken adamǵa turmysqa shyǵýǵa májbúr bolyp, týystarynyń aıtýynsha, keıinnen júıeli túrde turmystyq zorlyq-zombylyqqa tap bolǵan. 19 jasynda oǵan kúıeýin óltirdi degen aıyp taǵyldy. Sot ólim jazasyn taǵaıyndady, biraq onyń oryndalýy bıýrokratııalyq sebepterge baılanysty júıeli túrde keıinge qaldyryldy. Boıjetken qatań rejımdegi túrmege jiberilip, 10 jyl boıy ólim jazasyn kútýmen boldy.
Tutqynǵa alynǵan kezde Samıra Sabzıannyń eki balasy jáne ishinde sábıi boldy. Oǵan balalarymen on jyldan keıin tek bir ret – jeltoqsan aıynyń basynda, ólim jazasyna kesilgenge deıin kezdesýge ruqsat berildi.
Aıta keteıik, Iranda qyzdardyń zańdy nekege turý jasy 13 jas, biraq ákesiniń nemese atasynyń kelisimimen olar odan da erte turmysqa shyǵa alady.
Quqyq qorǵaýshylardyń aıtýynsha, Iran áıelderdi ólim jazasyna kesý boıynsha álemdik rekordqa ıe. Olardyń málimetinshe, Samıra Sabzıan 2023 jyldyń basynan beri darǵa asylǵan on jetinshi áıel boldy.
