Qazaqstan Respýblıkasy Ulttyq qaýipsizdik komıteti Shekara qyzmetiniń Aqtóbe oblysy boıynsha departamentiniń «Qııaly» shekara zastavasynda kelisimshart boıynsha áskerı qyzmetshi ekeýara janjaldyń saldarynan áriptesine qarýdan oq atqan. Er adam alǵan jaraqatynan jedel járdem kóliginde qaıtys boldy. Bul týraly Aqtóbe garnızonynyń áskerı prokýrory málimdedi, dep habarlaıdy “Adyrna” ulttyq portaly
Rolan Janysbaevtyń aıtýynsha, qazir áskerı tergeý basqarmasynyń qyzmetkerleri bolǵan oqıǵanyń mán-jaıyn anyqtaýda.
Qaqtyǵystyń naqty neden týyndaǵany, áskerı qyzmetkerlerdiń jasy neshede, olardyń otbasylyq jaǵdaıy, qyzmet ótkergen ýaqyty, bul derekterdiń barlyǵy tergeý múddesine jarııa etilmeıdi. Belgili bolǵandaı, eki áskerı qyzmetker de kelisim-shart boıynsha jumys istegen, ekeýi de Aqtóbe oblysynyń týmasy.
Sotqa deıingi tergeý bastaldy. Qylmystyq is boıynsha kúdikti qamaýǵa alyndy.
