Bala tárbıeleý – aýyr da, úzdiksiz is. Tehnologııalar damyǵan, jahandaný zamanynda balanyń bar ýaqytyn durys dúnıege baǵyttaý úshin ata-ana men ustaz aıanyp qalmasy anyq. Dese de bala tárbıeleýdiń sýperprogressıvti joly qandaı degen suraq ata-analardy jıi tolǵandyratyny ras. Qııalyn ushtap, bilimin shyńdap, oıyn keńitip, boıyn sergitý úshin ne isteý kerek? Árıne, balanyń qarym-qabiletine qaraı baıqaýlarǵa qatystyrǵan jón.
Soǵan oraı qarasha aıynyń on ekisinde kópke arman bolǵan Halyqaralyq "Damınosık" balalar men jasóspirimder arasyndaǵy óner baıqaýy uıymdastyryldy. Baıqaý 3-18 jas aralyǵyndaǵy balalar men jasóspirimderge arnaldy. Dúbirli dodaǵa 600-ge tarta qatysýshylar qatysty. Bul baıqaýdyń ózge baıqaýlardan ereksheligi sol, tek Qazaqstandyq balalar ǵana emes, Mońǵolııa, Qytaı elinen de júırikter at terletip keldi. Kil myqtylar horeografııa, vokal, kórkem sóz, aspapta oınaý, beıneleý óneri, akterlik sheberlik atalymdary boıynsha baq synady. Ishinen oq boıy ozyq shyqqan Almaty qalasynda ornalasqan «Chýdo detkı» bala-baqshasynyń túlekteri edi. Atap aıtsaq, 1-oryn kórkemsóz atalymy boıynsha Baýyrjanqyzy Sara jáne Murathan Raıanaǵa buıyrsa, akterlik sheberlik atalymy boıynsha gran-prıdi Amantaı Batyrhan, Hýsaın Nurıslam, Seıfýlla Ibrahım, Ermek Leısan, Qusanǵazy Aıanat, Talıpbaı Malıka esimdi baldyrǵandar qanjyǵasyna baılady. Osy oraıda balalardyń óner-bilimin ǵana emes, adamgershilik izgi qasıetterin damytqan, baıqaýda júldeger atanýyna, shyǵarmalyq shyńdalýyna úlken úlesin qosqan jetekshileri «Chýdo detkı» balabaqshasynyń ádiskeri Janar Sáttibekqyzynyń orny erekshe.
Qysqasyn aıtsaq, balanyń oılaýy oınaý arqyly qalyptasatynyn áý bastan bilgen babalarymyz, bóbeginiń bolashaǵyn qalaı oınaǵanyna qarap boljaǵan. Úıdegi ata-ana tirshilik qamymen ketkende, talshybyqtaı ul-qyzdardy tárbıeleıtin tárbıe mektebi – balabaqsha. Al osy baıqaýda dara shapqan balapandardyń baǵyna bitken «Chýdo detkı» balabaqshasy elimizdiń tutqasy bolar eren azamattardy tárbıelep jatqanynyna senimimiz mol.
Aqgúl AIDARBEKQYZY
