31 qazanda QR Premer-Mınıstri Álıhan Smaılovtyń tóraǵalyǵymen ótken Úkimet otyrysynda Tótenshe jaǵdaılar mınıstri Syrym Sháriphanov Kostenko atyndaǵy shahtadaǵy jaǵdaı týraly baıandady, dep habarlaıdy «Adyrna» ulttyq portaly.
Búgingi kúni izdestirý-qutqarý jumystary barysynda 45 kenshiniń denesi jáne aldyn-ala boljam boıynsha 46-shy qaza tapqan adamnyń dene bólshekteri tabyldy.
Qaıtys bolǵan 40 adamnyń jeke basy anyqtaldy, 6-y anyqtalmady. Olardy sáıkestendirý úshin tıisti saraptamalar júrgiziledi.
Izdeý jumystary elektr energııasynyń bolmaýymen, taý-ken qazbalarynyń uzyndyǵymen, kóptegen buzylǵan mehanızmderdiń bolýymen qıyndady. Sý basqan jekelegen taý-ken qazbalarynda jumys jasaý qıynǵa tústi. Qazirgi ýaqytta ashyq janý oshaqtary joq, gaz jaǵdaıy qalypty. Shahtanyń qyzmetin qalpyna keltirý úshin taý-ken qazbalaryn zertteý jáne jekelegen ýchaskelerde sý sorý jumystary júrgizilýde.
«Avarııanyń sebepterin tergep-tekserý sheńberinde Úkimettik komıssııa múshelerimen birge shahtaǵa tústim. Biz óte mańyzdy buzylýlardy anyqtadyq. Taý-ken qazbalarynda shahta jabdyqtary jyljyp ketken. 15-ten astam oqshaýlaǵysh bógetter men jeldetý qurylystary qıraǵan», - dep atap ótti mınıstr.
Qazirgi ýaqytta taǵy 7 shaǵyn komıssııa qurylyp, jumys istep jatyr. Sonymen qatar tergeýge Qazaqstannan jáne shetelderden saraptamalyq uıymdar tartyldy.
Esterińizge salaıyq, 28 qazanda saǵat 2-den 36 mınýt ketkende «ArselorMıttal Temirtaý» AQ Kómir departamentiniń Kostenko atyndaǵy shahtada tereńdigi 700 metrde janý bolyp, keıinnen metan-aýa qospasynan jarylǵan bolatyn.
«Adyrna» ulttyq portaly
