RAMS Qazaqstan kompanııasynyń qurylys sapasy syn kótermeı tur, dep habarlaıdy "Adyrna" tilshisi.
Bul týraly jas saıasattanýshy Sanjar Boqaev Facebook paraqshasynda vıdeo jarııalady. Kadr barysynda turǵyn úıdiń sapasyz qurylys materıaldarynan jasalǵanyn anyq kórýge bolady.
Qabyrǵalardyń ishi betonmen emes, penoplastpen toltyrylǵan. Ishi bos, tipti qabyrǵanyń ishinde belgisiz jándiktiń júrgeni de anyq kórinedi. Tozyǵy jetken qabyrǵalar, tolyq bitpegen qurylys armatýralary.
"Bıznes plıýs" sanatyndaǵy turǵyn úıde domofon jumys istemeıdi, órt sóndirý qurylǵylary qosylmaǵan. Podezdegi bıiktik shamamen 2,5 metrdi quraıdy. Kúzdiń qara sýyǵy kelse de páterdegi gradýs mólsheri tómen. Saldarynan 15 qazan kúni berilýi tıis jylý turǵyndarǵa áli berilmegen.
"Men sizderge úıdegi jabyq terezeden jeldiń qalaı ýildeıtinin kórsete alamyn. Sizder maǵan senbeısizder",-deıdi turǵyn.
RAMS Qazaqstan qurylys kompanııasy salǵan kópqabatty úıde kólik turaǵy da jeke saýdalanǵan-mys. Quny 5 mıllıon teńge turady eken.
Sanjar Boqaevtyń sózinshe qurylys barysynda ketken mundaı qateliktermen adamdar tura almaıdy.
"Mundaı bıik kópqabatty úıdi quyrylys-montaj sharalaryn saqtamaı soǵý aqylǵa qonymsyz. Ol úshin eshkim de jaýap bermeıdi. Ony eshkim teksermeıdi. RAMS Qazaqstan, bul úlken qatelik! Bul sizderge úndeý! Bireýi tapsyrys berýshi, ekinshisi qurylysqa jaýapty, úshinshisi oryndaýshy, tórtinshisi satýshy. Bul jaýapkershilikti ysyryp qoıý úshin ádeıi oılastyrylǵan",-deıdi saıasattanýshy.
