Qazaqstan 120 elmen bırge Taiau Şyǧysta tez arada atysty toqtatudy talap etetın qarardy qoldady, dep habarlaidy «Adyrna» ūlttyq portaly.
Ulysmedia.kz mälımetıne säikes, köpşılık dauyspen BŪŪ Bas assambleiasy bır top arab elderı ūsynǧan İzrail men Hamas arasynda Gaza sektoryndaǧy atysty toqtatudy talap etetın qarardy maqūldady. Būl qararǧa 120 el dauys berdı, İzrail men AQŞ-ty qosqanda 14 el qarsy boldy. Taǧy 45 el, onyŋ ışınde Ukraina da qalys qaldy. Rezoliusiiaǧa qarsylyq bıldırgen elder qatarynda Avstriia, Horvatiia, Chehiia, Gvatemala, Vengriia, İzrail, Marşall araldary, Mikroneziia, Nauru, Papua-Jaŋa Gvineia, Paragvai, Tonga jäne AQŞ boldy. Qalys qalǧan elder: Estoniia, Kanada, Finliandiia, Germaniia, Gresiia, Ündıstan, İrak, İtaliia jäne Japoniia bolsa, rezoliusiiany qoldaǧandar Resei, Armeniia, Äzerbaijan, Belarus, Qytai, Fransiia jäne İspaniia boldy. Keibır elder dauys beruden bas tartty. Būǧan qosa, BŪŪ Bas assambleiasy Kanada ūsynǧan jäne AQŞ qoldaǧan HAMAS-tyŋ İzrailge qarsy şabuyldaryn aiyptaityn tüzetudı qabyldamady. Eske salaiyq, 7 qazanda Hamas şabuyly nätijesınde evreilerdıŋ 1400 adamy qyrylyp qalǧan bolatyn, onyŋ ışınde 500 bala qaza tauyp, 200-den astamy kepılge alynǧan. Däl osy künı İzrail Gazaǧa 17-şı künnen berı jalǧasyp jatqan auqymdy äue şabuylyn bastady. Palestina bilıgınıŋ densaulyq saqtau ministrlıgınıŋ mälımetınşe, mūnda qaza tapqandar sany 5 myŋnan asty, onyŋ 2055-ı balalar. 15 myŋnan astam palestinalyq jaraqat aldy. Taǧy 1000-ǧa juyq adam qiraǧan ǧimarattardyŋ astynda joǧalyp kettı. Olardyŋ tırı ekendıgıne ıs jüzınde ümıt joq. Gaza sektorynda 30-dan astam izraildık bala kepılde otyr.«Adyrna» ūlttyq portaly
Ūqsas jaŋalyqtar
