Qasıetti ólkede týyp-ósip, týǵan jeri men elimizdiń órkendeýine súbeli úles qosyp júrgen birqatar tulǵalarǵa ulttyq mereke Respýblıka kúni qarsańynda Ulytaý oblysynyń «Qurmetti azamaty» ataǵy tabys etildi. Bul týraly oblys ákimi Berik Ábdiǵalıuly áleýmettik jelidegi paraqshasynda jazdy, dep habarlaıdy Egemen.kz.
Qazaq óneriniń alyby, ult murasyna eńbegi sińgen daýylpaz daýys ıesi, Jańaarqa aýdanynyń týmasy Qaırat Áýkenuly Baıbosynovqa Ulytaý oblysynyń qurmetti azamaty ataǵy berildi.
Sonymen qatar Ulytaý oblysynyń qurmetti azamaty ataǵy ǵalym, QR Ulttyq ǵylym akademııasynyń prezıdenti, QazVac vakınasyn ázirleýshi Ulytaý aýdany, Qarsaqbaı kentiniń týmasy Kúnsulý Daltonqyzy Zakarııaǵa, Qazaqstannyń qurmetti jýrnalısi, QR Jazýshylar odaǵynyń múshesi, jazýshy, Ulytaý aýdanynyń týmasy Batyrbek Tıyshtyqbaıuly Myrzabekovke, S.Qojamqulov atyndaǵy Jezqazǵan qazaq mýzykalyq drama teatrynyń ártisi, «Qurmet belgisi» ordeniniń ıegeri, QR Halyq ártisi Dosjan Ábdiráliuly Janbotaevqa, Qurmetti professor, Qanysh Sátbaev atyndaǵy «Qurmet» ordeniniń ıegeri Qaısar Jumahanuly Teleshovke berildi.
«Ulytaý oblysynyń qurmetti azamattaryn búgingi marapattarymen shyn júrekten quttyqtaımyn! Oblysymyzdyń damýyna el kóleminde úles qosyp, aıanbaı eńbektenip júrgenderińizge alǵys bildiremin», dep jazdy Berik Ábdiǵalıuly.
