Memlekettik keńesshi Erlan Qarın Qazaqstan Prezıdenti Qasym-Jomart Toqaevtyń Respýblıka kúnine arnalǵan sózinde basa mán bergen birqatar óte mańyzdy ıdeologııalyq basymdyqtarǵa toqtaldy. Bul týraly Telegram arnasynda jazdy, dep habarlaıdy “Adyrna” ulttyq portaly.
Ol Toqaevtyń sózinde ishki jáne syrtqy saıasatqa, áleýmettik-ekonomıkalyq saıasatqa jáne aımaqtardy damytýǵa qatysty tushymdy oı-pikir aıtylǵanyn jazdy.
1. Biz jalpyulttyq basty qundylyǵymyz – Táýelsizdikti qasterlep, qorǵaýymyz kerek. Sol úshin salıqaly syrtqy saıasat júrgizip, elimizdegi beıbitshilik pen kelisimdi saqtaımyz.
2. Qoǵamda radıkalızmniń, ekstremızmniń, quqyqtyq nıgılızmniń jáne turmystyq vandalızmniń kez kelgen kórinisine múldem tózbeýshilik ústemdik qurýǵa tıis. Eldegi turaqtylyq pen bereke-birlik – egemendik men memlekettilikti saqtaýdyń mańyzdy alǵysharty.
3. Sońǵy jyldary iske asyrylǵan ózgeristerden keıin ótkenge endi qaıta oralmaımyz. Reformalar halyqtyń saıası sana-sezimin edáýir ózgertti. Jurtymyz memleketti basqarýdyń burynǵy tásilin qaıtarýǵa jol bermeıdi.
4. Búgingi jastar – Qazaqstannyń keleshektegi kelbeti. Elimizdi damytý jolynda jas urpaqtyń jasampaz qýaty mańyzdy ról atqarady. Sondyqtan Memleket basshysy óz sózinde jastarǵa arnaıy úndeý joldady.
5. Adal eńbek pen jaýapkershilik ıgi isterdiń uıytqysy bolýǵa tıis. Qoǵamda eńbek adamyna erekshe qurmet kórsetilýi kerek. Bıyl 298 muǵalim men dárigerdiń, 259 aýyl eńbekkerleriniń, 119 eńbek ardagerleriniń, 88 óndiris salasy qyzmetkerleriniń memlekettik nagradalarmen marapattalýy kezdeısoqtyq emes.
Memlekettik saıasattyń mazmuny men ishki maqsat-mindetteri osyndaı myzǵymas qundylyqtarǵa negizdeledi.
