QR Saılaý komıssııasy Qazaqstan Respýblıkasy Prezıdenttigine kandıdattardyń saılaý qoryna túsken qarajattar men olardyń jumsalýy týraly esepti jarııalady, dep habarlaıdy QazAqparat tilshisi.
QR OSK 2019 jyldyń 17 mamyryndaǵy jaǵdaı boıynsha esepti usyndy. Máselen, Qasym-Jomart Toqaevtyń óz qarajaty jáne ony úmitker retinde usynǵan «Nur Otan» partııasy bólgen qarajat 510 mln teńgeni qurady. Respýblıka azamattary men uıymdardyń erikti aqsha aýdarymdary 514 mln 457 myń 970 teńge boldy. Kórsetilgen kezeńge deıin atalǵan somanyń 185 mln 593 myń 069,46 teńgesi jumsalǵan. Olar baspa, dybys-beıne jáne ózge de úgit materıaldaryn shyǵarýǵa jáne taratýǵa, sondaı-aq zańdy jáne jeke tulǵalardyń úgit jumystaryn uıymdastyrýǵa baǵyttalǵan. Sonymen qatar senim bildirgen adamdardyń kólik shyǵyndaryn jabýǵa, saılaýshylarmen kezdesý úshin úı-jaılardy jalǵa alýǵa tólengen.
Sádi-Bek Túgeldiń saılaý qoryna óz aqshasy jáne ony usynǵan «Uly Dala qyrandary» respýblıkalyq qoǵamdyq qozǵalysynyń esebinen 200 myń teńge túsken. El turǵyndary men uıymdar úmitkerdi qoldaýǵa erikti túrde 75 mln 872 myń teńge aýdarǵan. Shyǵys somasy - 76 mln 053 teńge.
Qazaqstan kommýnıstik halyq partııasy atynan Prezıdenttikke kandıdat Jambyl Ahmetbekovtiń óz qarajaty jáne partııanyń bólgen somasy - 250 mln teńge. Halyqtyń qaıtarymsyz negizde bergen soma - 88 mln 320 teńge. Úgit-nasıhat jumystaryna 289 mln 770 myń 683,72 teńge jumsalǵan.
Al Danııa Espaeva men ony usynǵan «Aqjol» partııasy saılaý qoryna aqsha aýdarmaǵan. Kandıdattyń qoryn 112 mln 967 myń teńgemen halyq pen uıymdar toltyrǵan. D.Espaeva bul somanyń 109 mln 495 myń 277 teńgesin jaratyp úlgergen.
«Qazaqstan Respýblıkasynyń kásipodaqtar federaııasy» Respýblıkalyq kásipodaqtar birlestigi jáne odan úmitker Amangeldi Taspıhov te saılaý qoryn toltyrmaǵan. Onyń shotyna túsken erikti aýdarymdardyń kólemi 101 mln 850 mln teńgeni qurady. Halyq arasyndaǵy úgit-nasıhat jumystaryna 75 mln 216 myń 780 teńge baǵyttalǵan.
«Aýyl» partııasy atynan saılaýǵa túsetin Tóleýtaı Rahymbekovtiń óz qarajaty jáne partııa aýdarǵan soma kólemi - 108 mln 007 myń teńge. Rahymbekovtiń shotyna halyqtyń jáne uıymdardyń atynan erikti aqsha múldem aýdarylmaǵan. Osy ýaqytqa deıingi shyǵysy - 77 mln 502 myń 977,85 teńge.
Kandıdat Ámirjan Qosanovtyń óz qarajaty esebinen jáne «Ult taǵdyry» qoǵamdyq birlestiginen saılaý qoryna 76 mln teńge túsken. El azamattarynyń erikti aýdarymdary 643 myń 600 teńgeni qurady. Qosanov baspa jáne ózge de úgit materıaldaryn shyǵarýǵa jáne taratýǵa, BAQ-qa shyǵýǵa, zańdy jáne jeke tulǵalardyń úgit jumystaryn uıymdastyrýǵa 52 mln 999 myń 706,88 teńge jumsaǵan.
Aıta keteıik, aldaǵy 9 maýsym kúni ótetin prezıdenttik saılaýǵa 7 kandıdat túsedi. Kandıdattardyń saılaýaldy úgit-nasıhat jumystary 11 mamyr kúni saǵat 18:00-de bastaldy. Ol 8 maýsym túngi saǵat 00:00-ge deıin jalǵasady. Daýys berý 9 maýsymda jergilikti ýaqyt boıynsha 07.00-20.00 aralyǵynda ótedi. Saılaý aıaqtalǵan kezden bastap 12 saǵattan keshiktirmeı saılaý ýchaskelerinde bıýlletenderdi sanaý júrgiziledi. Ákimshilik-aýmaqtyq birlikter boıynsha daýystardy sanaý nátıjeleri aýmaqtyq komıssııalardyń otyrystarynda belgilenedi jáne OSK-ǵa eki kún merzim ishinde (11 maýsymnan keshiktirmeı) jetkiziledi. Ortalyq saılaý komıssııasynyń saılaý nátıjelerin belgileýine jáne jarııalaýyna, saılanǵan Prezıdentti tirkeýine 7 kún kózdelgen.
