Ashǵabat meshitterinde juma kúngi ýaǵyz-nasıhat kezinde ımamdardyń prezıdent Gýrbangýly Berdimuhamedovti súıýge shaqyryp, qudaıdan oǵan myqty densaýlyq pen uzaq ómir tileýi - úırenshikti qubylys. Azattyqtyń Túrkimen qyzmeti tilshileriniń aıtýynsha, endi meshitterde "ýaǵyz-nasıhatqa prezıdenttiń jaýlaryn" da qosa bastaǵan.
Azattyqtyń Túrkimen qyzmetiniń tilshileri ótken juma kúngi ýaǵyz-nasıhatqa qatysyp, ımamdardyń prezıdentti madaqtap qana qoımaı, onyń jaýlaryna laǵynet aıtqanyn da kórdi.
"Alla ony barlyq bále-jalalardan saqtasyn jáne dushpandary aıaǵyna kelip jyǵylsyn".
Azattyq tilshileri mamyrdyń 17-si kúni aıtylǵan ımamdardyń ýaǵyz-nasıhatynan osylaısha úzindi keltiredi.
"Juma namazy aıaqtalǵannan keıin bolatyn ýaǵyz-nasıhat kezinde ımam prezıdentti madaqtaı bastady. Ol Arqadaǵtyń kemeńger saıasatynyń arqasynda eldiń barlyq jetistikke qol jetkizip, azamattardyń baqytty ómir súrip jatqanyn aıtty. Paıǵambardyń óz otanyn súıgeni tárizdi Arqadaǵ pen óz elin jaqsy kórýge shaqyrdy" dedi aty-jónin aıtpaǵan Azattyq tilshisi.
Imam sonymen birge qasıetti Ramazan aıy kezinde "barsha azamat qudaıdan Túrkimenstan ári qaraı da damı bersin" dep tileýi tıis degen.
"Imam qudaıǵa syıynyp, prezıdent Gýrbangýly Berdimuhamedovke myqty densaýlyq jáne uzaq ómir berýin surady. Alla barlyq bále-jaladan saqtap, onyń dushpandary men qarsylastaryn jazalasyn dep aıtty" deıdi tilshi.
Onyń aıtýynsha, meshitte adam kóp bolǵan jáne juma namazyna kelgenderdiń kóbi dindi bıliktiń úgit-nasıhat quraly retinde paıdalanyp jatqanyna narazy bolǵan.
"Imam saıası málimdemeler aıta bastap edi, kóbi "taǵy da bastaldy" dep bir-birine sybyrlady. Adamdar "barlyq problema men qıyndyqtar sol Arqadaǵtyń arqasynda" desti" dedi Azattyq tilshisi.
Ol meshit qabyrǵasynyń syrtynda "Túrkimenstan - baqyt pen gúldený ordasy" degen jazýy bar úlken banner ilinip turǵanyn da aıtty.
"Azattyq" radıosy
