7 qazanda tańerteń Izraıldiń ortalyq jáne ońtústik bólikterine Gaza sektorynyń zymyrandary shabýyl jasaǵany aıtyldy. Sonymen birge HAMAS toby elge basyp kirgen bolatyn. Batys elderi HAMAS-tyń shabýylyn aıyptap otyr, dep habarlaıdy "Adyrna" tilshisi DW agenttigine siltep.
BAQ betterinde bul soǵys sońǵy jyldardaǵy Izraıl men Palestına arasyndaǵy qaqtyǵystyń eń úlken órshýi dep baǵalanýda.
Izraıl memleketiniń premer-mınıstri Benıamın Netanıahý halyqqa jasaǵan úndeýinde Palestınanyń radıkaldy HAMAS uıymyna qarsy áskerı operaııa uzaqqa sozylatyn jáne kúrdeli bolatynyn aıtty.
"Biz bul soǵysta birgemiz, bul soǵys qıyn bolady. Bizdi qıyn kúnder kútip tur, biraq men bir nárseni ýáde etkim keledi: Qudaıdyń kómegimen, ortaq kúsh — jigermen, Izraılge degen senimimizdiń arqasynda biz jeńemiz", - dedi ol.
Izraıl qorǵanys armııasy Gaza sektoryndaǵy 10 HAMAS nysandaryna, sonyń ishinde qozǵalystyń barlaý shtab-páterine soqqy bergenin málimdedi. Bul týraly Izraıl qorǵanys armııasynyń Telegram kanalynda jarııalandy.
Saldarynan 2,8 myńnan astam adam jaraqat alsa, 434 adamnyń qaıtys bolǵany belgili boldy.
Eýroodaqtyń syrtqy saıasat jónindegi vedomstvo basshysy Jozep Borrel odaqtyń Izraılmen birge ekenin aıtty.
Sondaı-aq, birneshe eldiń basshylary bul soǵysta Izraıldy qoldaıtynyn jetkizdi.
Germanııa syrtqy ister mınıstri Annalena Berbok HAMAS-tyń Izraılge shabýylyn aıyptap, beıbit azamattarǵa kúsh qoldanýdy dereý toqtatýǵa shaqyrdy. Óz sózinde ol Germanııanyń Izraılmen birge ekenin aıtty.
Túrkııa prezıdenti Rejep Erdoǵan jáne Reseı syrtqy ister mınıstrligi eki taraptardy sabyrǵa shaqyrdy.
Ulybrıtanııanyń qorǵanys mınıstri Twitter-degi paraqshasynda:
"Ulybrıtanııa HAMAS-tyń Izraıl azamattaryna jan túrshigerlik shabýylyn sózsiz aıyptaıdy. Ulybrıtanııa Izraıldiń ózin-ózi qorǵaý quqyǵyn árdaıym qoldaıdy" ,- dep jazdy Ulybrıtanııa qorǵanys mınıstri Djeıms Kleverlı.
Ýkraına prezıdenti Vladımır Zelenskıı qaıtys bolǵan azamattardyń týystaryna kóńil aıtty.
Memleketter arasyndaǵy bul qaqtyǵys 76 jyl boıy jalǵasyp keledi.
