Nur-Sultan ákimdigi «Aq jol» partııasynyń 31 mamyr repressııa qurbandaryn eske alý kúni mıtıng ótkizý týraly ótinishine kelisim bermedi, dep habarlaıdy partııanyń baspasóz qyzmeti.
«Aq jol» partııasy repressııa jáne ashtyq qurbandaryn eske alý maqsatynda 31 mamyrda beıbit sherý ótkizýge ruqsat berýdi ótingen. Óz ótinishinde partııa eki túrli nusqany usynǵan: birinshisi, partııa músheleriniń qatysýymen mıtıng, ekinshisi, jeke sóz sóıleıtin azamattarsyz, qurbandar qurmetine bir mınýt únsizdikpen sherýdi bastaý.
Partııanyń jazýynsha, sherý 2-3 saǵatqa sozylýy jáne oǵan 3000 adam qatysýy múmkin bolǵan. Sherý marshrýtyn ákimshilik tańdaıdy dep oılaǵan.
Búgin ákimshilik bul ótinishke kelisim bermegeni belgili boldy. Sebebi ótinishte uıymdastyrýshylardyń aty-jóni, olardyń turǵylyqty meken-jaıy, jumysy, sherýdiń maqsaty, formasy jáne ótetin orny belgilenbegen.
«Ótinish hattyń qanaǵattardyrylmaý sebebi hat normatıvtik-quqyqtyq aktilerge saı jasalmaǵan», - delingen ákimshilik jaýabynda.
