Dástúrge aınalǵan bul týrnır bıyl jıyrma besinshi ret ótkeli otyr.
25-26 mamyrda Almaty qalasy «Balýan Sholaq» atyndaǵy sport kesheninde grek-rım kúresinen dástúrli halyqaralyq «Bolat Turlyhanov Kýbogy» ótedi.
Alǵash ret jalaýy 1994 jyly jelbiregen bul týrnır bıyl jıyrma besinshi ret ótkeli otyr. Áý basta Semeı qalasynda ótip kelgen bul týrnırdiń Alataý bókterine kelgenine de birneshe jyl boldy.
Búkilálemdik kúres keńesiniń (UWW) kúntizbesine engizilgen «Bolat Turlyhanov Kýbogy» tek olımpıadalyq alty salmaqta(59, 67, 77, 87, 97 jáne 130 keli) ótedi.
Bıylǵy dúbirli dodaǵa elimizdiń úzdik palýandarymen qosa grek-rım kúresinde álemde kóshbasshy elder sanalatyn Reseı, Iran, Koreıa, Armenııa, Belarýs, Qyrǵystan, Ózbekstan jáne taǵyda ózge elderdiń kúres sheberleri qatyspaq. Joǵaryda atalǵan elder qatarynda birneshe Álem jáne Olımpıada chempıondary qatysady dep kútilýde.
Jarystyń qurmetti qonaqtary qatarynda Aleksandr Karelın, Kamandor Madjıdov, Kım En Nam, Jaqsylyq Úshkempirov syndy kúres áleminiń tiri ańyzdary bar.
Búkilálemdik kúres keńesiniń (UWW) resmı saıtynyń habarlaýynsha, týrnırdiń jeńimpazdary men júldegerlerine medaldar men dıplomdar tabystalady. Eń bastysy uıymdastyrýshy komıtet úzdik balýandarǵa arnaıy qarjylaı syıaqy daıyndalǵan.
Búgingi kúnge deıin jarysty joǵary deńgeıde uıymdastyryp kelgender bıyl da óz bıiginen kórinýdi josparlap otyr. Dástúrge aınalǵan týrnırdiń jyl saıyn tabystalyp kele jatqan qarjylaı syıaqysy tómendegideı.
1 oryn - 3 000 AQSh dollary
2 oryn - 2 000 AQSh dollary
3 oryn - 1 000 AQSh dollary
Bıyl «Balýan Sholaq» sport keshenine palýandardy qoldaýǵa kelgen jankúıerlerdi de qur qol qaıtpaıdy. Uıymdastyrýshylardyń sózinshe jankúıerlerdi de baǵaly syılyqtar kútip tur.
Eske salaıyq, Bolat Turlyhanov - Qazaq SSR-nyń eńbek sińirgen jattyqtyrýshysy. Semeı óńirinde dúnıege kelip, 1956 jyly Qazaq dene shynyqtyrý ınstıtýtyn támamdaǵan. Sanaly ǵumyrynda talaı saqa palýandardy baptap, olardy kúreskerlik rýhqa, jeńiske degen erik-jigerlilikke, tózimdi bolyp alǵa jyljýǵa, bıik maqsat qoıa bilip, asqaq armanǵa jetýlerine jetelegen.
Sýretter Prosports.kz saıtynan jáne ǵalamtordan alyndy.
