Búgin Nur-Sultan qalasynyń Baıqońyr aýdanyndaǵy Halel Dosmuhameduly kóshesinde ornalasqan bes qabatty jataqhanada órt shyqty. Qalalyq qoǵamdyq densaýlyq saqtaý basqarmasynyń staıonarly qyzmetti uıymdastyrý bóliminiń basshysy Aslan Jangereevtiń aıtýynsha, órt saldarynan 26 adam aýrýhanada jatyr, dep habarlaıdy Stan.kz tilshisi.
«Búgin saǵat 10:39-da tótenshe jaǵdaılar departamentiniń 101 pýltine Baıqońyr aýdany Halel Dosmuhameduly kóshesindegi bes qabatty jataqhanadan órt shyqqany týraly habar kelip tústi. 8 mınýttan soń oqıǵa ornyna birinshi bolyp órt sóndirý brıgadasy kelip jetti. Bes qabatty jataqhananyń ekinshi qabatynda jıhaz órtenip, órt 20 sharshy metrdi sharpyǵan. Órt sóndirýshiler avtosatynyń kómegimen 32 adamdy qaýipsiz jerge kóshirdi. Jedel járdem kóligi 26 adamdy, onyń ishinde 14 balany aýrýhanalarǵa jetkizdi. Qazirgi kezde 11 bala aýrýhanada jatyr", - dep aıtty Jangereev.
Oqıǵa ornyna qala ákimi Baqyt Sultanov, Nur-Sultan qalasy TJD bastyǵynyń mindetin ýaqytsha atqarýshy Marǵulan Amanbaev bardy.
Órt sóndirýshilerdiń barlyq is-qımyly jataqhananyń joǵarǵy qabattarynan úsh baǵanaly, 3 shabýyl satysy, qutqarý arqandary jáne AL-30 kómegimen adamdardy qutqarýǵa baǵyttaldy. Sondaı-aq zardap shekkenderdi izdestirý úshin gaz-tútinnen qorǵaý qyzmetiniń býyndary qosymsha jumyldyryldy.
Órt sóndirýshilerdiń jedel jáne úılesimdi is-qımyldary negizinde 32 adam qutqaryldy, onyń ishinde 28-i bala. Órt tolyǵymen sóndirildi.
Órt sóndirýge jeke quramnan 66 adam jáne Órt sóndirý qyzmetiniń 18 tehnıkasy jumyldyryldy. Órttiń sebebi anyqtalyp jatyr.
