Otandyq loýkoster - Fly Arystan áýe kompanııasynyń alǵashqy jolaýshylary elordaǵa Roza Baǵlanova atyndaǵy Airbus A320 ushaǵymen ushyp keldi. Elimizdegi alǵashqy loýkoster – Fly Arystan bıýdjettik áýe kompanııasy Almatydan Nur-Sultan qalasyna alǵashqy reısin oryndady, dep habarlaıdy Sputnik Qazaqstan tilshisi.
Qazaqstannyń tuńǵysh prezıdenti – Elbasy Nursultan Nazarbaevtyń tapsyrmasymen qurylǵan Fly Arystan bıýdjettik áýe kompanııasy búgin alǵashqy reısin oryndady. Almatydan ushyp shyqqan ushaq elordaǵa saǵat on bir jarym shamasynda qondy.
Aıtpaqshy, otandyq loýkosterdiń alǵashqy jolaýshylary elordaǵa Roza Baǵlanova atyndaǵy Airbus A320 ushaǵymen ushyp keldi.
"Nazarbaevtyń tapsyrmasy oryndaldy"
Alǵashqy ushaqty qarsy alýǵa "Samuryq Qazyna" ulttyq ál-aýqat qory" AQ basqarma tóraǵasy Ahmetjan Esimov, ındýstrııa jáne ınfraqurylymdyq damý mınıstri Roman Sklıar, "Eır Astana" kompanııasy tobynyń prezıdenti Pıter Foster keldi.
Alǵashqy bolyp sóz alǵan Ahmetjan Esimov aldymen jınalǵan qonaqtardy búgingi 1 mamyr merekesimen quttyqtady.
"Osydan týra jarty jyl buryn Elbasymyz Nursultan Nazarbaev halyqqa tıimdi, arzan áýe kompanııasyn ashý týraly tapsyrma bergen edi. Sol tapsyrma búgin oryndalyp otyr. Úlken júıeli jumys atqaryldy. Birinshi ushaq Almatydan elordamyzǵa qondy. Búgingi kúnnen bastap endi Qazaqstannyń basqa da qalalaryna baǵyttar ashylady. Búgin biz úshin aıtýly kún desek te bolady", - dedi Esimov.
Indýstrııa jáne ınfraqurylymdyq damý mınıstri Roman Sklıar Qazaqstanda jyl saıyn áýe jolaýshylarynyń sany artyp kele jatqanyn tilge tıek etti. Máselen, byltyr shamamen 8 mıllıon jolaýshy tasymaldanǵan, bul 2017 jyldyń kórsetkishinen 6 proentke artyq.
Mınıstr bul proesten Qazaqstan da shet qalmaýy kerektigin atap ótti.
Bıleti arzan áýe kompanııasynyń jospary qandaı
"Eır Astana" kompanııasy tobynyń prezıdenti Pıter Foster jýrnalısterge qazaqstandyq loýkosterdiń jospary týraly aıtyp berdi.
"Qazir bul ushaq Tarazǵa, Qaraǵandy, Oralǵa ushady. Osy aıda Pavlodar men Shymkentke reıster ashylady", - dedi ol.
Onyń aıtýynsha, aldaǵy ýaqytta halyqaralyq reıster ashý josparlanyp otyr.
"Osy jyldyń qazanynda úshinshi jáne tórtinshi ushaqtardy alǵannan keıin halyqaralyq baǵyttardy ashý josparda bar. Ázirge Orta Azııa, Kavkaz jáne Reseıge ushýdy kózdep otyrmyz", - dedi Foster.
Buǵan qosa, kelesi jyly jazǵy maýsymda elimizdiń kýrortty aımaqtaryna da ushaqpen jetýińiz múmkin.
"2020 jylǵa josparlap otyrmyz. Ystyqkól men Alakól baǵyttaryn qarastyryp jatyrmyz. Biraq naqty datasyn aıta almaımyn", - dedi ol.
Ushaqtaǵy tamaqtyń baǵasy
Rýslan Tagaev Fly Arystan-nyń alǵashqy jolaýshylarynyń biri. Almatydan ushyp kelgen fotograf otandyq loýkosterdiń qyzmetine dán rıza.
"Bıznes klass joq, bári bir jerde otyrady. Tar emes, oryndyqtary da yńǵaıly, jaıly", - deıdi ol.
Ol ushaqta tegin tamaq bermeıtinin, biraq óz aqshańa satyp alýǵa bolatynyn aıtty.
"Máselen, irimshikpen jasalǵan sendvıch pen shaı 1200 teńge, al taýyq etimen 1400 teńge turady. Al shaıdyń ózi qatelespesem 300 teńge, snıkers te 300 teńge", - dedi jolaýshy.
Aıtýynsha, ushaq borty jolaýshylarǵa toly bolǵan, arasynda ata-ájeler de, balalaryn ertken ata-analar da bar.
Aıtpaqshy, ushaqtyń dárethanasy da tegin eken.
Fly Arystan – "Eır Astana" áýe kompanııasynyń bólimshesi. Loýkoster bıletteri 29 naýryzdan beri satylyp jatyr. Bastapqyda Almatydan Tarazǵa jáne Oralǵa ushatyn reısterge satylsa, keıin Nur-Sultan, Qaraǵandy, Pavlodar jáne Shymkent baǵyttary qosyldy.
Qazaqstanda bıyl mıllıonǵa tarta jolaýshy eki ese arzan baǵamen usha alady
Fly Arystan áýe kompanııasynyń marketıng jáne satylym jónindegi dırektory Janar Jaılaýovanyń aıtýynsha, qazir elý myńǵa jýyq jolaýshy bılet alǵan. Olardyń 85 proenti – salmaǵy 5 keliden aspaıtyn qol júgimen bılet satyp alǵandar.
"Máselen, Almaty men Taraz arasynda bılet baǵasy 4 myńnan bastalady. Al Almatydan Nur-Sultanǵa 7 myń teńgeden, Oralǵa 12 myń teńgeden bastalady", - dedi Jaılaýova.
Bıyl, onyń aıtýynsha, otandyq loýkoster 700 myń adamdy, kelesi jyly 2,5 mıllıon, al 2022 jyly 4 mıllıon jolaýshyny tasymaldaýdy josparlap otyr.
Fly Arystan ushaqtarynyń ortasha jasy 6 jyldy quraıdy.
