Jelide jazasyn ótep jatqan eks-general Serik Kúdebaevtyń sýreti paıda boldy, dep habarlaıdy “Adyrna” tilshisi.
Túrmede túsirilgen sýret jeli qoldanýshylar arasynda qyzý talqyda. Sýrette Kúdebaev mol jaıylǵan dastarhan basynda birneshe adammen otyrǵany beınelengen.
Eske sala keteıik, bıyl sáýir aıynyń sońynda general Serik Kúdebaev «aýyr zardaptarǵa ákep soqqan qyzmettegi áreketsizdik» úshin kináli dep tanylyp, 10 jylǵa bas bostandyǵynan aıyrylǵan bolatyn. Tergeý málimetteri boıynsha, ol qańtar oqıǵasy kezinde Almaty oblysynyń komendanty bola turyp, departament ǵımaratynan shyǵyp ketken.
Kúdebaev 23-24 naýryzda Qazaqstannan qashyp ketken. Ol Qyrǵyzstan shekarasyn zańsyz kesip ótip, Bishkekke kelip, odan keıin Túrkııaǵa jol tartty. Kúdebaevqa izdeý jarııalandy. Sáýir aıynyń sońynda onyń ustalǵany týraly belgili boldy.
Buǵan deıin Qyrǵyzstanda Kúdebaevtyń qashý faktisi boıynsha qozǵalǵan qylmystyq is boıynsha bes aıyptalýshy sottalǵan bolatyn.
