Týylmaǵan sábıler elinde boldym búgin túsimde. Qaqpadan kire bere kip-kishkentaı shekarashy qarsy aldy. Júzime tańyrqap qarap turdy da, meni bir aınalyp shyǵyp, azdap tolqyǵan únmen “Úlken adam keldiiiii!” dep birneshe ret jar saldy. Sol-aq eken, san myń bala jan-jaqtan ketti jınala. Aınalama topyrlaǵan olar meni qorshap alyp qol-aıaǵymdy, shashtarymdy ustap kórip jatty. Endi biri qulaǵyma jańǵyryp sóılese, ekinshisi moınyma asylyp alyp erkeleýde edi. Árqaısy bir-birine qarap, sóılesip, birese, kelesi biriniń sózderin jatty maquldasyp. “Úlkender osyndaı bolady dep aıttym ǵoı!” dep taǵy biri sózin nyqtap qoıar. Áıteýir, máz-meıram bop, úlken “oıynshyqpen” oınap jatyr balalar. Bir mezet kishkentaı bala júgirip keldi de, qolymnan súırep, ózimen ákete bastady. Basqalar da meni bosatyp qoıa berdi.
- Aǵa, júrińiz! Júrińizshi! Men sizge úıdi kórsetemin! - deıdi enteleı júrip ertip keledi.
- Áı, balaqaı?! Sen kimsiń? Qaıda apara jatsyń meni? - deımin kishkentaıdy toqtatyp, ózime qarata azdap jymıyp.
- Úýýýı, tanymadyńyz ba, shynymen? Sadyq aǵa, men sizdiń inińizbin ǵoı Qozy aǵadan keıingi! - dedi kúlimsirep.
- Eeee, sen qaıdan? Sol inim senbisiń?! - deımin júzine anyqtap qarap. Azdap tutyǵyp qaldym. Qushaqtap aldym. Júzine qarasam, mamam sýrettegendeı shashtary qaıratty, aqsarydan kelgen bala eken. Maǵan da, Jasmınge de uqsaıtyn sııaqty. Bálkim, Oralhanǵa.
- Iııáááá! Endi júrińiz tezirek. Úlgermeı qalamyz, áıtpese! - dep súırep meni bir kishkentaı úıge alyp keldi. Kishkentaı eken rasynda.
Úıdiń ishine syıyp kirdim. Kirgen boıda meni úıimen tanystyra ketti.
- Aǵataı, mynaý meniń úıim. Mynaý meniń besigim...
Úıindegi barlyq zattary oryn-ornynda ádemi jınalǵan. Qonaq kútip otyrǵandaı eken beıne bir. Besigi bolsa, men jatqan besiktiń dál ózi. Kishkentaı júgirip bardy da, besikke sekirip jatyp aldy. Jatqany sol-aq eken besik túrli túske boıalyp, ishinen áldı áni estile bastady mamamnyń. Ishinde mamanyń bizge aıtqan barlyq áldıiniń daýsy saqtalǵan eken.
- Kúnde osylaı mamamyzdyń daýsyn estip uıyqtaımyn, aǵataı! - dedi, - Siz de mamanyń daýsyn estip uıyqtaısyz ba?
- Joooq, janym, men úlken balamyn ǵoı. Maǵan mamalar áldı aıtpaıdy! - dedim jymıyp.
- Al, maǵan aıtaady kúnde. Azanda oıanǵan kezde de mamanyń daýsymen oıanamyn! - dedi kókiregin maqtanysh kernep.
Qulaǵyma “Sadyqjaaan, turyńdar endi jata bermeı!”, “Sharmontaı (Oralhan), tura ǵoı, sabaǵyńa keshigesiń!” degen mamamyzdyń úni estile bastady. Jymıdym.
Ári qaraı kórsete bastady. Úı bólmeleriniń ár buryshynda bizdiń kishkentaı kezimizde oınaǵan oıynshyqtarymyz jınalyp tur. Qarap turyp ózimniń joǵaltqan plastık sary mashınamdy, buzyp tastaǵan júk kóligimdi jáne atam kóligimen basyp syndyryp ketken úsh dóńgelekti velosıpedimdi tanydym.
- Bulardyń bárin jóndep qoıǵanmyn, aǵataı! - dedi maǵan súıine qarap, - Rábı ápsheniń, Qozy aǵanyń, Oralhannyń, tipti, Jasmınniń de oıynshyqtaryn buzylǵan oıynshyqtaryn taýyp alyp, jóndep qoıdym.
- Jaraısyń! - dedim basynan sıpap.
- Endi sizge men eń jaqsy kóretin jerdi kórsetemin! - dep qolymnan ustady da, taǵy bir bólmege kirgizdi.
Ortasynda úlken aına bálkim, sáýle sııaqty bir zat bar bólmeniń ishi tolǵan sandyqtar eken.
- Bul meniń “Otbasym” dep atalatyn bólmem! - dedi maǵan qarap.
- Munda ne bar?! - dedim qyzyǵa.
- Men osy bólmeden sizderge qarap otyramyn…
Aınaǵa qaraǵanym sol edi, Astanadaǵy úıdiń ishinde bolyp jatqan oqıǵalar kórine bastady. Apam otyr. Rabıǵa jumys istep otyr. Qozy jastyqta telefon shuqylap jatyr. Kókem men mamam jumystan kelmegen sııaqty.
- Aǵataı, al men myna buryshtaǵy sandyqtarǵa bizdiń otbasynyń barlyq estelikterin jınap qoıǵanmyn. Bári, bári bar mende. Kúnde qarap otyramyn! - dep ádemi sandyqtardy birinen keıin birin asha bastady.
- Mynaý Qozy aǵa oqý bitirip kelgendegi úıdiń qýanyshy. Mynaý Jasmın týylǵan kezdegi qýanysh. Al, mynaý Oralhan kelgen kezdegi otbasynyń qýanyshty sátteri.
Áp sátte bári kóz aldymnan óte shyqty.
- Bárin jınap alypsyń ǵoı. Keremet jınaq jasapsyń! - dep maqtap qoıamyn syr bildirmeı.
- Al, myna sandyqta tek mamamyzdyń baqytty sátteri bar. Kórgińiz kele me?
- Árıne, asha ǵoı! Kórgim keledi ǵoı, - dedim kózim ashyǵa.
- Endeshe qarańyz, mynaý siz teledıdarǵa shyqqan kezde mamamnyń qarap otyrǵan sezimi. Myna jerde Rábı ápshe saıtqa shyqqan kezde sony oqyp otyryp qýanǵan sáti. Sizdiń kitabyńyz shyqqan kez. Mynaý bolsa, kókem ekeýiniń qyrdaǵy úıdegi baqytty sátteri… - dep barlyq jıǵanyn ashyp kórsetip jatty. Sheshemniń qýanyshtan kózinen tamshy úıirilgenin kórgendeı boldym. Ári qaraı kókemniń, atamnyń, ájemniń, meniń... sandyqtarymyz eken.
- Aǵataı, bizdiń mamamyz qandaı?
- Hmm, qalaı aıtsam eken…? - dep oılanyp qaldym bir sát.
- Jumsaq pa? - dep saýalyn jalǵastyryp ketti.
- Árıne. Jup-jumsaq...
- Taǵy qandaı? - dep maǵan qaraı qabaǵyn asha tústi.
Teńeý tappaı qaldym osy joly.
- Qalaı aıtsam eken, bizdiń mamamyz meıirimdi ǵoı. Bizdiń mama onymen qosa óte aqyldyyy, - dedim.
- Ony seziný qandaı bolady? Mama sizge meıirimdi bolǵan kezde sizge jumsaq bolyp seziledi me?
Osy jerde ol úshin búkil sezim jumsaq-qatty nemese jyly-sýyq bolyp qana seziletinin túsindim. Kúldim.
- Árıne, qoshaqan. Jumsaq jáne jyp-jyly bolady mamalar.
- Keshe mamamyz jumystan sharshaý bolyp keldi. Uıyqtap qaldy. Keshe birdeńeni ýaıymdap qalǵan sııaqty boldy maǵan? - dedi kishkentaı azdap alańdap.
- Bilmedim, keshe mamamen sóılese almadym…
Birtúrli bolyp tymyraıyp qaldy.
- Mamalarmen kúnde sóılesý kerek qoı! - dep renjigendeı kózben qarady.
- Ieeı, janym inim-aý, keshirshi. Budan bylaı kúnde sóılesýge tyrysamyn. Úlken balalar aqymaq bolady, umytyp kete beredi ǵoı ony, - dep shekemdi uryp qoıyp, jubata qushaqtadym ony.
- Men munda “Úıine kele jatyp mamasynan adasyp qalyp ketken” balalardyń qataryna jatamyn… - dedi jymıyp.
- Basqa taǵy qandaı balalar bar sonda? - dedim toqtatyp.
- Basqaaaa, “Úılerine kele jatyp mamalary joldan qaldyryp ketken” balalar bar… - dedi júzi ózgerip.
Taǵy da meıirlene qushaqtadym. Dál Rabıǵany, Qozyny, Oralhandy, Jasmındi qushaqtaǵandaı.
Ol maǵan úıiniń aınalasyn, aýlasyn, kóshelerin, aǵashtaryn kórsetti. Biraz qydyrdyq. Meniń ózimniń esimnen shyqqan kóp nárselerdi aıtyp berdi inim.
- Mynaý sizder qyrdaǵy úıdiń tapshannyń aınalasyna ekkenderińiz! - dep úlken aǵashtardy kórsetti.
- Áı, ol aǵashtar sol boıy óspeı qýrap ketken edi ǵoı! - dedim tańyrqaǵan kúıi qarap.
- Men óspeı qalǵan kóshetterdi taýyp alyp qaıtadan ósirdim ǵoı! - dedi meniń qolymnan qysyp ustaǵan kúıi.
Qoldaryn ustap, qasyna otyra kettim. Únsizdik ornady.
- Sizge munda qalýǵa bolmaıdy, aǵataı! - dedi azdap muńly daýyspen.
- Bilemin…
- Sadyq aǵa, ár mama ekiqabat kezde ishteı balasyna bir at qoıyp qoıady eken ǵoı. Mamamyzdan meniń atymdy surańyzshy, ıá ma? - dedi meıirimdi kózderimen maǵan ótingen kúıi.
- Suraımyn, janym inim. Mindetti túrde suraımyn.
- Taǵy… Sol atpen meni ómirde bir ret bolsyn daýystap, shaqyryńyzshy, ıá..?
Oıanyp kettim. Jylap jatyr ekenmin.
Esimdi jıyp mamaǵa qońyraý shaldym. Bir saǵat boıy sol kishkentaıǵa ekiqabat bop júrgen kezderindegi qyzyqtaryn aıtyp berdi.
- Baıaǵyda jıi esime alyp turatyn edim… Keıin tirliktiń áýresimen ol da sırep ketti ǵoı. Túsime kiretin edi. Alystan qaraıtyn. Bálkim, "Mamataıdy qorqytyp almaıynshy" dep jaqyndamaǵan shyǵar... Kókeń qaaatty jaqsy kórip edi. Túsip qalǵanda qatty jylap edi, - dep ótken sátterdi eske aldyq. Sol kishkentaıdy kóterip júrgen kezindegi kórgen tústerine deıin esinde eken, tipti… Ana ǵoı. Onyń aty - Ana...
...Al, seniń esimiń - Meıirhan…
