Almaty oblysyndaǵy Uıǵyr aýdanynyń atyna qatysty osydan bir jyl buryn post jazǵanmyn. Sodan beri jaǵdaıdy saraptaı kele oıym edáýir ózgerip, bul taqyrypty basqa qyrynan túsine bastadym. Sávet Odaǵy tarqaıtyn tusta, kommýnıster búkil odaqta ártúrli avtonomııalar quryp, baıaý jarylatyn bomba tastap ketti. Bir-birimen týyspaıtyn qanshama halyqty bir avtonomııaǵa biriktirip, bolashaqta túbi bir qyrqysatyndaı qylyp qoıdy. Uıǵyr aýdany da týra sondaı maqsatpen qurylǵan. Odaq biraq tarqap ketti de, olardyń bul jymysqy jospary iske aspaı qaldy.
«Uıǵyr aýdanynyń aty sol kúıi qalǵany sizderge kerek pe?» dep, Almatydaǵy qanshama uıǵyrdan surap kórdim. Uıǵyr aýdanynyń atyn kerek etip turǵan uıǵyr joq. Olarǵa tynyshtyq pen beıbit ómir kóbirek kerek eken. Oılana kele, aýdannyń atyn ózgertkennen qazaq qazir utpaıtynyn, utylyp qalatynyn túsindim. Nege deısiz ǵoı? Keıingi aıda osy aýdannyń atyn ózgerteıik dep belsenip, sodan saıası upaı jınaǵysy keletin pıǵyl baıqalyp júr. Oǵan kóp adam arandap qalyp jatyr. Keıbireýi zakazben jumys istep júrgendeı áser qaldyrdy. Qytaıda qazir qazaqtyń bir avtonomııaly oblysy men qazaqtar turatyn úsh birdeı aýdan bar. Eger biz Uıǵyr aýdanynyń atyn ózgertsek, qytaılar da bizden kórip istegendeı bolyp, Qytaıdaǵy álgi oblys pen aýdannyń atyn ózgertip jiberip, ondaǵy qazaqtarǵa taǵy qysym kórsete bastaýy múmkin eken. Osy máselede tym ústirt oılamaı, jeti ret ólshep baryp, bir ret kesken jón. Uıǵyr aýdanynyń atynda turǵan eshteńe joq. Bolashaqta ol báribir ózgeredi. Ol búgin bolmasa da, erteń túbi bir bolady, túbi bir aýysady. Biraq dál qazir Qytaıdyń da arydan oılaıtyn osyndaı jymysqy saıasatynyń jeteginde ketip qalyp, ókinip qalyp júrmeıikshi degen oı edi..
Jolymbet Mákish
Avtordyń pikiri redakııa kózqarasyn bildirmeıdi.
