Qazaqstan prezıdentine úmitker jáne qazirge memleket basshysy Qasym-Jomart Toqaev ortalyq saılaý komıssııasynyń lıngvıstıkalyq komıssııasyna qazaq tilinen emtıhan tapsyrdy dep habarlaıdy KAZ.NUR.KZ.
"Búgin lıngvıstıkalyq komıssııa óz jumysyn bastap, birinshi bolyp prezıdenttikke basty úmitker, qazirgi ýaqyttaǵy prezıdent Qasym-Jomart Toqaevtan emtıhan aldyq", - dedi Qazaqstannyń prezıdenttigine kandıdattyń memlekettik tildi erkin meńgergenin anyqtaıtyn lıngvıstıkalyq komıssııa tóraǵasy Myrzataı Joldasbekov.
Ol memleket basshysyna "Abaı Qunanbaıulynyń poezııasy. Qara sózderi" taqyryby túskenin aıtty.
"Birinshi shyǵarma jazǵanda Abaıdyń poezııasy, qara sózderi, onyń jalpy halyqqa beretin mańyzy týraly búgingi úmitkerimiz tereń tolǵady. Óte ádemi jumys.
Biz bul jumystan birde-bir qate kórgenimiz joq. Sherhan Murtazanyń "Myńbulaq" áńgimeler men hıkaıattar jınaǵynyń úsh betin oqydy. Mánerlep, yrǵaǵymen óte ádemi oqyp berdi.
Al "Qazirgi Qazaqstannyń geosaıasaty" jaıynda keń tolǵady, tereń sóıledi. Jalpy bizdiń lıngvıstıkalyq komıssııanyń bergen qorytyndysy: Qasym-Jomart Kemeluly Toqaev memlekettik tildi tolyq, jan-jaqty meńgergen", - dedi komıssııa tóraǵasy.
