"Tabıǵat" ekologııalyq odaǵynyń lıderi Mels Eleýsizov Qazaqstan prezıdenti saılaýyna úshinshi márte qatysýǵa daıyn. Bul týraly ol KTK telearnasyna bergen suqbatynda málimdedi.

"Saılaýǵa ózim túsemin. Eger meni qazir ótkizbese, ózime unaıtyn kandıdattyń komandasyna qosylamyn. Qalaı bolǵanda da men bul saılaýǵa qatysamyn. Qajet bolsa, óńirlerdi aralap, úgit-nasıhat jumystaryn ózim júrgizemin", - dedi Eleýsizov.

Ol prezıdent taǵyna talasýǵa zańdy quqyǵy bar ekenin aıtyp, óziniń qoǵamdyq uıymy 90-shy jyldardyń basynda tirkelgenin eske saldy.

Aıta ketsek, Mels Eleýsizov Qazaqstan prezıdenti saılaýyna eki márte tústi: 2005 jyly 0,28% daýys jınasa, al 2011 jyly – 1,15%. 2011 jylǵy saılaýda ol Nursultan Nazarbaevqa daýys berip, jýrnalısterge bıýlletenin kórsetken edi.

Qazaqstanda kezekten tys prezıdent saılaýy 9 maýsymda ótedi. Prezıdenttikke kandıdattardy elimizde tirkelgen saıası partııalar men repýblıkalyq qoǵamdyq birlestikter usynýǵa quqyly. Úmitkerlerdi usyný 10 sáýirde bastaldy, endi ol 28 sáýir 18:00-ge deıin jalǵasady.