Búgin Shymkent qala kúni merekesine oraı №45 mektep-gımnazııanyń qosymsha korpýsynyń saltanatty ashylý rásimi ótti. Oǵan Shymkent qalasynyń ákimi Murat Áıtenov pen qalalyq máslıhattyń tóraǵasy Bahadyr Narymbetov qatysty.
Shahar basshysy mektep janynan qurylǵan lagerde demalyp jatqan búldirshinderdiń ónerin tamashalap, jańa oqý korpýsyndaǵy kabınettermen tanysyp shyqty.
Jańa korpýsta kúzet bólmesi, ashana jáne sport zaly, sondaı-aq, ınformatıka jáne AKT, qazaq tili men ádebıeti, matematıka, tarıh, geografııa, aǵylshyn tili, hımııa, fızıka, bıologııa pánderine arnalǵan kabınetter men STEM kabınet jáne debat qozǵalysyna arnalǵan kabınet bar. Munan bólek fızıka, hımııa jáne bıologııa zerthanalary da qarastyrylǵan. Barlyq kabınetter qajetti qural-jabdyqtarmen qamtylǵan. Sondaı-aq, mektep-gımnazııanyń aýlasynda balalar alańy men shaǵyn fýtbol alańy salynǵan.
Osylaısha, Shymkentte taǵy bir mektep úsh aýysymnan eki aýysymdy oqytýǵa kóship otyr. Bıylǵy jyly qalada úsh aýysymdy mektepter máselesi tolyǵymen sheshiledi.
Sonymen qatar qala ákimi M.Áıtenov qaladaǵy №2 balalar saz mektebiniń jańartylǵan ǵımaratymen de tanysty. Munda 1 myńnan astam oqýshynyń vokal, bı óneri jáne 14 túrli aspapta oınaýdy úırenýine qolaıly jaǵdaı jasalǵan.
Aıta keteıik, Shymkentte sońǵy bes jylda 48 810 oryndyq 105 mektep paıdalanýǵa berilgen. Onyń ishinde, 80 paıyzy jeke ınvestor esebinen salynǵan.
