Parlament memlekettik jáne azamattyq qyzmetshilerdiń jekelegen sanattarynyń jalaqysyn arttyrýǵa múmkindik beretin zańdy qabyldady, dep habarlaıdy Sputnik Qazaqstan tilshisi.
Senat úsh jyldyq respýblıkalyq bıýdjet týraly zań jobasyn tıisti túzetýlermen tómengi palataǵa keri qaıtarǵan bolatyn. Óıtkeni qosymsha shyǵyndar eskerilip otyr. Jańa memlekettik organ – Elbasy keńsesin qurýǵa (1 mıllıard teńge) jáne jalaqysy tómen qyzmetkerlerdiń eńbekaqysyn arttyrýǵa (37 mıllıard teńge) bıýdjetten qarjy bólinedi.
Májilistiń jalpy otyrysynda qarjy jáne bıýdjet komıtetiniń múshesi Serik Qusaıynov bul zańǵa sáıkes qazaqstandyqtardyń jalaqysyn artatynyn atap ótti.
"Senat engizgen ózgertýler memleket basshysynyń memlekettik jáne azamattyq qyzmetshilerdiń jekelegen sanattarynyń jalaqysyn ósirýdi 1 shildeden 1 maýsymǵa jyljytý tapsyrmasyn oryndaýǵa baǵyttalǵan. Respýblıkalyq bıýdjet shyǵynyn 38 mıllıard teńgege arttyrý usynylyp otyr", - dedi májilis depýtaty.
Májilis depýtattary senat engizgen ózgeristerdi qoldap daýys berdi.
Eske sala ketsek, Qazaqstannyń tuńǵysh prezıdenti - Elbasy Nursultan Nazarbaev "Nur Otan" partııasynyń sezinde 2019 jyldyń 1 shildesinen bastap bıýdjet salasyndaǵy aılyǵy tómen qyzmetkerlerdiń jalaqysyn 30%-ke, aýdandyq jáne oblystyq deńgeılerde tikeleı halyqpen jumys isteıtin atqarýshy organdardyń tómengi satydaǵy qyzmetkerleriniń jalaqysyn ortasha eseppen 25%-ke ósirýdi tapsyrǵan bolatyn.
Keıinirek Qazaqstan prezıdenti Qasym-Jomart Toqaev jalaqysy tómen qyzmetkerlerdiń aılyǵyn 1 shildeden emes, 1 maýsymnan bastap kóterý týraly tapsyrma berdi.
