Astana qalasy ákimdigi elordanyń 25 jyldyǵyna oraı «Astana – meniń Otanymnyń Elordasy» atty áleýmettik týryn bastady. Joba sheńberinde elimizdiń túkpir-túkpirinen kelgen 1000 bala bas shahardyń kórikti jerlerin tamashalaýǵa keledi. Olardyń qatarynda az qamtylǵan jáne kópbalaly otbasylardyń balalary men túrli saıystardyń jeńimpazdary bar. Balalar 3 kúndik joldama arqyly Astananyń birqatar tarıhı-mádenı nysanymen tanysatyn bolady.
Alǵashqy bolyp kelgen Abaı oblysynyń oqýshylary búgin máre-sáre bolyp úılerine qaıtty.
Balalar 3 kún ishinde «Báıterek» monýmentin, «Nur Álem» bolashaq energııasy mýzeıin, QR Tuńǵysh Prezıdentiniń mýzeıin, QR Ulttyq mýzeıin, «Han Shatyr» saýda oıyn-saýyq ortalyǵyn aralap, Okeanarıým, Djýnglı, Qazaqstandaǵy eń úlken sholý dóńgelegi, batýt saıabaǵy sııaqty saýyqtyrý oryndaryna bardy. Bul olardyń saıahattaryn qyzyqty ári kóńildi ótkizýine múmkindik berdi.
«Biz qalanyń ishindegi kóptegen nysandardyń tarıhymen tanystyq. Astana – elimizdegi taza ári ásem qalalardyń biri. Balalar úshin bul demalys jan-jaqty uıymdastyrylǵan. Olar baǵdarlama barysynda murajaı, saıabaq jáne oıyn-saýyq keshenderine bardy», - dep áserimen bólisti oqýshy Qýanysh Sembekov.
Jobaǵa jaýapty qalalyq Investıııalar jáne kásipkerlikti damytý basqarmasynyń bólim basshysy Ómirzaq Tileýjannyń sózinshe, balalardyń saıahatyn Astana qalasynyń ákimdigi tolyqtaı qarjylandyrǵan. Jatyn ornymen jáne úsh mezgil tamaqpen qamtylǵan. Qala ishinde arnaıy avtobýspen júredi.
«Jalpy bul týr birinshi ret uıymdastyrylyp otyrǵan joq. Pandemııaǵa deıin úsh jyl qatarynan ótkizgenbiz. Mine sodan keıin 4 jyl ótkende qalamyzdyń shırek ǵasyrlyq mereıtoıyna oraı jobany jańa formatta qaıta jańǵyrta otyryp júzege asyryp jatyrmyz», – deıdi Ómirzaq Tileýjan.
Joba munymen toqtap qalmaıdy. Ári qaraı Almaty qalasynda jalǵasyn tabatyn bolady.
