Maýsymnyń tórti – Memlekettik rámizder kúnine oraı Almatyda «Batyr» Prezıdenttik polkiniń tý kóterý tobynyń saltanatty rásimi jáne gımndi jappaı oryndaý ótti.
Patrıottyq is-shara «Medeý» bıik taýly sport kesheninde ótti. Saltanatty sharaǵa Almaty ákimi Erbolat Dosaev, máslıhat depýtattary, jurtshylyq pen jastar uıymdarynyń ókili qatysty. Is-sharaǵa barlyǵy myńnan astam adam qatysty.
Merekelik ánuran bir ýaqytta qalanyń barlyq aýdanynda saǵat 11:00-de oryndaldy. Almaty turǵyndary saıabaqtarda, skverlerde, mektepterde jáne basqa da qoǵamdyq orynda eldiń ánuranyn oryndady.
Memlekettik rámizder kúnin merekeleý jalaýlarmen velojaryspen jalǵasty. Jarysqa 500-den astam almatylyq qatysty. Velojarys Shevchenko kóshesimen ótti: M.Gandı saıabaǵynan Qonaev kóshesine deıin. Qashyqtyq máresinde qatysýshylar Qazaqstannyń ánuranyn oryndady.
Merekelik is-sharalardyń sońy ashyq aspan astyndaǵy konertke ulasady. Abaı alańynda qala turǵyndary úshin otandyq estrada juldyzdary: Marhaba Sábı, Qazbek Quraıysh, Nurjan Kermenbaev, Dılnaz Ahmadıeva, Jubanysh Jeksenuly, «Made in KZ» jáne «Araı tribute» toptary jáne t.b. óner kórsetedi. Konert Qurmanǵazy atyndaǵy konservatorııa stýdentteri men Jambyl atyndaǵy memlekettik hordyń jastar quramynyń ánurandy oryndaýymen aıaqtalady.
