21 maýsym kúni Semeıde avtobýs órtenip ketti. Bul týraly Abaı oblysy Tótenshe jaǵdaılar departamentiniń baspasóz qyzmeti jazdy, dep habarlaıdy «Adyrna» tilshisi.
Áleýmettik jelilerde avtobýstyń janyp jatqan beınejazbasy taraldy.
Basqarmanyń málimdeýinshe, tótenshe jaǵdaı týraly habarlama «101» pýltine saǵat 8:50-de túsken.
«Jolaýshylar tez arada avtobýstan shyǵyp úlgerdi. Qutqarý bólimsheleri kelgennen keıin 2013 jylǵy PAZ avtokóligi júrip bara jatqanda qozǵaltqysh bóliginiń bólshekteri, aspaptar paneli, salonnyń ishki qaptamasy, otyrǵyshtary men kýzovy janyp jatqany anyqtaldy. Órt aýmaǵy 20 sharshy metr boldy. Órt tez arada sóndirildi», - delingen habarlamada.
Boljam boıynsha órttiń bolýyna qaýiptiligi joǵary agregatqa salǵyrt qaraý sebep bolǵan.
Zardap shekkender men qaza tapqandar joq.
<
