Eks-prezıdent Nursultan Nazarbaev Abaı oblysyndaǵy órt saldarynan qaza tapqan adamdardyń otbasyna kóńil aıtty, dep habarlaıdy "Adyrna" Nazarbaevtyń resmı saıtyna siltep.
Onda "Abaı oblysyndaǵy aýqymdy órt saldarynan orman sharýashylyǵynyń birqatar jumysshylarynyń qaıǵyly qazaǵa ushyraǵany týraly habardy zor kúızelispen qabyldadym" delingen 11 maýsymda jarııalanǵan habarlamada.
"Qaza bolǵandardyń týystary men jaqyndaryna kóńil aıtamyn, zardap shekkenderdiń tez arada saýyǵyp ketýin tileımin. Qolǵa alynyp jatqan sharalar arqyly bul apat eńseriledi dep senemin",- dep tilegin bildirgen Nursultan Nazarbaev.
Buǵan deıin órt aımaǵynda 14 adam qaza tapqan. Taǵy bir adamnyń habar-osharsyz ketkeni habarlanǵan.
Eske salaıyq, sońǵy málimetter boıynsha, tótenshe jaǵdaı jarııalanǵan Abaı oblysyndaǵy orman órtiniń aýmaǵy 60 myń gektardy qurap, turǵyndar birneshe eldi mekennen kóshirildi. Órtten shyqqan tútin Jetisý óńirin basyp úlgerdi.
Oqıǵalardan soń Iýrıı Ilın Tótenshe jaǵdaılar mınıstri qyzmetinen bosatyldy. Onyń ornyna Syrym Sháriphanov taǵaıyndaldy. Abaı oblysynyń ákimi Nurlan Uranhaevqa sógis jarııalandy. Órtke baılanysty qylmystyq is qozǵalyp, ony arnaıy prokýrorlar tergep jatyr.
11 maýsymda prezıdent Qasym-Jomart Toqaev qaıtys bolǵan 14 adamnyń barlyǵyn «Qurmet» ordenimen marapattady. 12 maýsym Qazaqstanda jalpyulttyq aza tutý kúni bolyp jarııalandy.
