Syr óńirindegi jumyssyzdyq deńgeıi 4,9 paıyz boldy. Bul týraly oblys ákimi Nurlybek Nálibaev Astana qalasyndaǵy Ortalyq kommýnıkaııalar qyzmetinde ótken brıfıngte aıtty.
«Halyqty jumyspen qamtý, jańa jumys oryndaryn ashý – basty mindetterimizdiń biri. Prezıdenttiń 10 myń adamǵa 100 jańa jumys ornyn qurý tapsyrmasyna sáıkes byltyr óńirde 12 myńnan astam jumys orny qurylyp, jyldyq jospar 263 paıyzǵa oryndaldy. Osynyń nátıjesinde, jalpy jumyssyzdyq deńgeıi 4,9 paıyz, jastar arasyndaǵy jumyssyzdyq 4 paıyzǵa tómendedi», – dedi aımaq basshysy.
Aıta keteıik, bıyl Qyzylorda oblysynda «Óńirlik jumyspen qamtý jol kartasy» bekitilip, kórsetkishti 4,8 paıyzǵa deıin tómendetý kózdelgen.
«Búgingi kúnge Óńirlik kartadaǵy jospardyń 43,3 paıyzǵa oryndalýyna qol jetkizdik, ıaǵnı 19 myń jumys orny quryldy. Onyń ishinde turaqtysy – 6952 nemese 36,6%, ýaqytshasy – 12055 nemese 63,4%, 16 myńǵa jýyǵy – jańa jumys oryndary», – dedi Nurlybek Mashbekuly.
