Aqtóbe oblysyna issaparmen kelgen Úkimettiń jumys toby turǵyndarmen kezdesti. Kezdesý barysynda Kúlásh Shámshıdınova «Álippe ornyna qaıtyp keledi» dep jınalǵandardy qýantty.
QR Bilim jáne ǵylym mınıstri aýysqan saıyn elimizde bilim baǵdarlamasynyń da aýysatyny úırenshikti jaǵdaıǵa aınaldy. Degenmen, bul kúni keshegi «Álippeni» ańsaıtyndar kóp. Aqtóbelikterdi óńirge jumys saparymen kelgen jańa QR Bilim jáne ǵylym mınıstri Kúlásh Shámshıdınova qýantty. Álippe qaıta oralady.
«Álippege baılanysty aıtaıyn, bıylǵy oqý jylynda álippeni qaıtaryp úlgermeımiz. Al, kelesi oqý jylynda álippe ornyna qaıtyp keledi. Balalarǵa bilimdi ózderi izdeýge úıretýimiz qajet», - dedi Kúlásh Shámshıdınova.
Elde balaǵa bilim beretin pedagogtardy qaıta daıarlaý qolǵa alyndy. 144 myńnan kóp muǵalim kýrstardan ótedi. Mektep psıhologtary, synyp jetekshileri de qaıta daıarlanady.
«Jalpy mekteptegi bilimniń sapasy muǵalimniń sapasyna baılanysty. Aldaǵy úsh jylda jańartylǵan bilim baǵdarlamalaryna saı jańa metodıkalyq, tehnologııalyq ádistemelerge úıretý úshin 144 myńnan artyq muǵalim qaıta daıyndaý kýrstarynan ótedi. 82 myń mektep psıhology men synyp jetekshileri de kýrstardan ótedi. 15 myńnan artyq kolledj qyzmetkerleri men pedagogıkalyq ýnıversıtetterde jumys isteıtin pedagogtar orta bilimniń jańarýyna baılanysty qaıta oqytylady. Kóp eldi tolǵandyryp, qaıta-qaıta aıtylyp júrgen másele – joǵarǵy synyptarda hımııa, fızıka, bıologııa, ınformatıka pánderin aǵylshyn tilinde berý. Mektepte sabaq beretin kadr, mektep daıyn bolǵan kezde ózderińizben kelise otyryp, kezeń-kezeńimen kóshetin bolamyz», - dedi mınıstr.
Kúlásh Shámshıdınova elde mektepter salý týraly suranystar jer-jerden kóp túsetinin de atap ótti. 2019-2021 jyldar aralyǵynda Qazaqstanda 190 mektep salynady. Olar apattyq jaǵdaıdaǵy úsh aýsymdaǵy bilim mekemeleriniń ornyn aýystyrady.
«Táýelsizdik jyldary Qazaqstanda 1 672 mektep salynǵan. Apattyq ǵımaratta ornalasqan, úsh aýysymda jasaıtyn, oqýshylardyń oryny jetpeıtin mektepterdiń problemasyn sheshetin bolady. Tek Aqtóbe oblysy boıynsha aldaǵy úsh jylda 9 mektep salynady. Biz jalpy mektep muǵalimderin qoldaýymyz qajet. Balalarymyzǵa patrıottyq tárbıe berý úshin Qazaqstan tarıhy, qazaq tili, geografııa pánderiniń mazmundary óz elimizdiń mentalıtetine saı júrgiziledi. Mektepte bilim berýge er azamattarty shaqyrý kerek. Sebebi, balabaqsha men mektepte áıelderdiń tárbıesin alǵan balalar qyz sekildi bolyp barady», - dedi QR Bilim jáne ǵylym mınıstri Kúlásh Shámshıdınova.
BAQ.KZ
