Qasym-Jomart Toqaev bokstan ötken älem chempionatynyŋ jüldegerlerımen jüzdestı

Memleket basşysy Qasym-Jomart Toqaev bokstan Taşkent qalasynda ötken älem chempionatynyŋ jüldegerlerın qabyldady, dep habarlaidy "Adyrna" ūlttyq portaly. Prezident Qasym-Jomart Toqaev bokstan Özbekstannyŋ  Taşkent qalasynda ötken  älem chempionatynyŋ jeŋımpazdary – Sanjar Täşkenbai, Mahmūd Sabyrhan, Aslanbek Şymbergenov, Nūrbek Oralbai jäne kümıs medal iegerı Dulat Bekbauovty, sondai-aq bokstan Qazaqstan ūlttyq qūramasynyŋ müşelerı men bapkerlerın qabyldady.

– Älemdık jarysta tört  altyn, bır kümıs medal alu – zor jetıstık. Qazaq jıgıtterı älem chempiony atanyp, elımızdıŋ mereiın ösırdı. Osy mümkındıktı paidalana otyryp, barlyq janküierlerge alǧysymdy bıldıremın. Olardyŋ dauysy sonau Taşkent törınen anyq estıldı. Däl osyndai şynaiy qoldau sportşylarymyzǧa airyqşa küş bergenı sözsız.   Sport dodasyn bükıl halqymyz kördı, sızderge tılekşı boldy  dep aitsaq, artyq bolmaidy. Men de finaldaǧy jekpe-jekterdı tügel kördım. Jıgıtterımız el namysyn qorǧau üşın bar küşın salyp aiqasty. Jelbıregen kök tuymyzben jäne änūranymyzben bırge halqymyzdyŋ ruhy köterıldı. Ūlttyŋ asqaq ruhy jäne otanşyldyq qasietı degenımız – osy! Öitkenı sportşylarymyzdyŋ ärbır jeŋısı eldı qanattandyrady.  Şyn mänınde, ötken jeksenbı qazaq boksynyŋ asyǧy alşysynan tüsken kün boldy. Mūhittyŋ ar jaǧynda Jänıbek Älımhanūly chempiondyq ataǧyn abyroimen qorǧady. Onyŋ jeŋıstı joly  Taşkentte jalǧasty. Osynyŋ bärı barşa qazaqtyŋ mereiın tasytty, – dedı Prezident.

Prezident sportşylardy jarqyn jeŋısımen qūttyqtap, olardyŋ jarqyn jetıstıkterı küllı elımız üşın aituly oqiǧa ekenın atap öttı. Jeŋımpazdarǧa aldaǧy bairaqty bäsekelerde el namysyn abyroimen qorǧaitynyna senım bıldırdı. Sonymen qatar, Qazaqstan boks federasiiasynyŋ basşylyǧyna, sportşylar men bapkerlerge Qazaqstan Respublikasy Prezidentınıŋ Alǧys hattary men Qūrmet gramotalaryn tabystady.

"Adyrna" ūlttyq portaly